تحدث الفنان حسن فؤاد عن رأيه في الأصوات المصرية حاليًا: "أغلبهم صوتهم على قدهم ونطلع منهم كام واحد بس وهما عارفين كده كويس، يعني لما أروح أجيب أغنية البندقية لعبد الحليم حافظ وألاقي واحد واخد الدعاء الأخير ومسجله ستديو يا بني أنت مش واخد بالك ده عبد الحليم حافظ؟".
وتابع حسن فؤاد خلال تصريحاته مع الإعلامية انجي هشام في برنامج "المنسي" عبر قناة "هي": "عبد الحليم زي ما قال مجدي العمروسي متصدقهوش غير وهو بيغني، الغنوة دي ضخمة جدا وعبد الحليم حافظ كان عنده خبرة كافية، أنت هتجيب مشاعره منين؟ ، هتجيب خبرة عبد الحليم منين؟، أنا بكلمك على مطرب بيتقال عليه سوبر ستار كان بيغني معايا كورال في يوم من الأيام فوجئت أنه واخد الدعاء بتاع البندقية ومسجلها ستديو لا".
ووجه حسن فؤاد رسالة للمطربين بشأن الأغاني الوطنية: "أرجوكم أبعدوا عن الأغاني الوطنية عشان خاطري، ممكن في الحفلات نغنيها لكن تخش ستديو وتغنيها وتفرضها على الناس الإحساس ميت".
وتحدث حسن فؤاد عن رأيه في المطربة آمال ماهر: "آمال ماهر أنا حضرت ولادتها وعمار الشريعي قالي تعالى هاخدك يا حسن اسمعك صوت ولما سمعتها قلتلوا ايه ده يا أستاذ ده محدش يغني زيها غير أم كلثوم بس، قالي أنا خايف اقول كده يقولوا الراجل اتجنن، عمار الشريعي نفسه قال كده وآمال ماهر خسارة كبيرة جدا، من أهم الأصوات اللي طلعت في التسعينات لحد وقتنا هذا متقارنش بحد كصوت، عندنا أنغام بونبونايه جميلة وشيرين جميلة، ومي فاروق جميلة بس آمال ماهر في حته لوحدها".
