حروف اسمك بتغرينى
كأن الإسم بكينى
وانا راجل من الأرياف
اذا بصت لى ست باخاف
وباتنيل علي عينى
حروف اسمك عليها دلال !!
ياخبر اسود ..وعهد الله رهيب ياعيال
كأنها من لغة تانية بتمشي بكيفها فى البطال
وماتت أمى مافتكرتش ترقينى
مفيش ولا نقطة بنت حلال
عليكى إسم !! مش ممكن... كأنه غزال
حروف ماشية بتتهادى...
حروف لم تعرف العادة....وولادة
بيطلع منها ميت موال
وحرف المد من طوله.... سبع حركات
تمن حركات......واخدها ف وشه للسماوات
حبال الصوت بتتشعبط آهات ف آهات
ولما بتوصل الآخر يطب القلب ساكت مات
لكن من موته يحيبنى
ولو بصينا ع المعنى ...نقول ياسلام
نقوله وننسى أى كلام
واذا كنا ساعتها صيام ..بلاش منه
لأنه أكيد هيسقينى
حروف اسمك تكفى الشعرا جيل ورا جيل
وفيها بلاغة يخجل من عينيها النيل
تصحى الخلق تتوضي لقيام الليل
لها رنة.... كطير مبسوط اذا غنى
وفى التجويد...بصوت ( محمود علي البنا )
يجيب إدغام على غنة.....تلاقي المعنى كله خشوع
حروف اسمك دى حاجة خارج الموضوع
وتفسيرها يعوز تفسير
وانا ولا قلبي شعراوى...ولا ابن كثير
طرح اسمك ف روحى عبير
ومن بذر الحروف الكلمة طرحت شعر..
شعر كتير......ولسه كمان
