دلوقتى الشباب وحتى الأطفال على السوشيال ميديا بقوا يقيموا البلوجر والشخصيات المشهورة على السوشيال ميديا من خلال عدد المتابعين على صفحاتهم، لكن ده مش مقياس للمستوى الاجتماعى و ملوش علاقة تماماً بالمستوى المادى ولا ينفع يكونوا مربوطين ببعض، فى بعض الناس ومنهم البلوجر وناس كتير معروفة قدرت السوشيال ميديا تنقلهم من مستوى مادى لمستوى مادى أعلى ولكن عمرها ماهتقدر تنقلهم لمستوى اجتماعى حقيقى أعلى بعيداً عن المنظر العام، ولا هتقدر تغير فى أصولهم ونشأتهم .
وحابه أوصل من وجهة نظرى إن من عيوب السوشيال ميديا أنها خلت الطبقات والمستويات كلها واحدة، واللى بيتحكم فيهم ويحدد مستواهم وطبقتهم هم عدد المتابعين اللى عندهم، فبقى اللى عنده عدد كبير من الفولوارز هو الأحسن والأعلي.. النصيحة اللى محتاجة أقولها للناس وخاصة الشباب متخلوش السوشيال ميديا توهمكم إن هى دى الحياة الطبيعية وإن ده المستوى اللى مفروض نوصله، ولا تبصوا لحياة البلوجر وتفهموا إن ده الإنجاز اللى المفروض يتحقق ، انت ك إنسان متعلم ومثقف وعارف مستواك وطبقتك وبيئتك اللى اتربيت فيها ممكن تكون أفضل وأحسن مليون مرة من شخص لا يملك غير شوية متابعين غيروله مستواه.
رقية الديب بلوجر وصانعة محتوى
اجتماعى على السوشيال ميديا
