حلت الفنانة فريدة سيف النصر ضيفة على الإعلامية "لميس الحديدي"، في برنامج "كلمة أخيرة"، المذاع عبر شاشة "on e".
وتحدثت فريدة سيف النصر عن فترة حجابها، قائلة: أنا بخاف من الموت جدًا وجبانة جدًا، وبمجرد ما بشوف حيوان بيموت قدامي بيحصل لي رهبة، وأخويا مات عنده 21 سنة، ولما اتحجبت اتطلقت الطلقة التانية لأنه معجبش جوزي.
أقرأ أيضا فريدة سيف النصر: "زوجي اتعلق من بيتي وصاحبتي خطفته"
واستكملت حديثها: مبشفش قبر ولا بروح عزاء مش ندالة مني ولكن مبقدرش، والوحيدة اللي جاتلي البيت واتحجبت بعديا علطول سوسن بدر وهي أختي في الرضاعة، وياما اتهزقت من عفاف شعيب بس رديت عليها واتصالحنا.. ومحدش قدر عليا، وقررت أخلع الحجاب لما دخلت مع ناس محجبات وعملنا محل مع بعض ومخدتش فلوس خالص منه.. وحسيت إني لازم أنزل اشتغل.
وعن رأيها في عمليات التجميل، قالت فريدة: أنا هستفاد إيه لما أنفخ نفسي وتجيلي بعدها أمراض كتيرة، وأنا جبانة جدًا وبخاف من الحقن.. وسعيدة بظهور التجاعيد على وشي، البوتوكس بينفخ الوش وبيجيب أمراض.. البوتوكس ده معمول من نوع من سم التعابين، ومعنديش مشكلة مع الشكل لأني لما اتنفخ وأتعب بعدها هستفاد ايه ربنا خلقنا كده وهنكمل كده.
وتحدثت الفنانة فريدة سيف النصر عن العديد من الأسرار في حياتها الشخصية ومنها تعرضها للخيانة من زوجها مع صديقتها.
وقالت فريدة سيف النصر متحدثة عن خيانة زوجها لها مع صديقتها: زوجي اتعلق من بيتي وصاحبتي خطفته.. وكنت بسيبها تاكل وتشرب وأنرل أروح التصوير وأجيبلهم حاجات، وكانت من برا الوسط الفني.
وأضافت فريدة سيف النصر: اكتشفت الخيانة من التليفون.. رفعت سماعة التليفون وسمعت كلام لا يمكن أتخيله، وهو ضربني وقال لي دي جزمتها برقبتك، وطلبت الطلاق لأني عندي عزة نفس.. وكانوا متجوزين وأنا مكنتش عارفة، ومحمد ابني وهو صغير كان بيقول لي حاجات مخدتش بالي منها.
