يابنت الناس
يا بنت الناس لا شعري اصفر
ولا عيوني كاسات ألوان
ولون البشره متعفر
شقا وحرمان
فـ مش لايق عليا أكون فتى الشاشه
دنا صعيدي وقلبي بالحنان مليان
ومش هعرف أقول حبيني
ولا أقدر أعيش بردان
ولا ليا ف أغاني الحب
و لا ليلي أعده نجوم
ولا ارسم ع الحيطان قلبين
مابينهم سهمك المرسوم
أنا تلاقيني وقت الشده
جبل أحمال
أهد الكون عشان خاطرك
واكون سندال
أطوف الأرض شرق وغرب
أجبلك منها يا سمره اللي تتمانيه
لكن مقدرش أكون صوره
لحد انت بتستنيه
مانا والحب مختلفين
لكن عندي الميزان معدول
بحبك بس بطرقتي
ومش شرط بكلام معسول
ده طبعي
وطبع الرجال غالب
ولو بالحب هتلاقي
قلبي ف البحور قارب
لكن معرفش أشيل ورده
ولا دبدوب في عيد الحب
ولا تلقيني بتصور
وعامل بين إيديا قلب
انا حبي بكرامه وهيبه
صعيدي وكلمتي دستور
بحبك حب م الآخر
فلازم يبقى برضه ف نور
فلو حسيتي ببعادي
وإن كلامي مش موصول
فلازم تسألي قلبك
يدلك إني ابن أصول
بحبك بس مقدرش
أقرب برضه يوم منك
ومن جوايا بشتقلك
وينطق صوتي... إزيك
طب إزيك يا بنت الناس
يا توب العشق ومنايا
لو ابعد بيكي واتغرب
هتبقى برضه ويايا
