رتب أوراقك من جديد
حاول تبان إنك سعيد
عدي حدود المملكه
قطع خيوط الشرنقه
ألمك يدوب لساه شرار
طفيه أوام
أياك تهاوده يبقى نار
حط النقط فوق الحروف
اكتب كتابك ع الظروف
واقبلها ليك
تكون شريك
من غير كسوف
ارسم بلون أخضر طريق
وجمله بشجره وصديق
شجره تضلل الطريق
وصديق يدلك ع الطريق
ارسم كمان حبه وشوش
من غير لطوش
متبسمه ومتوسمه
ضحكتها مش متزينه
ولا مداريه فى أقنعه
ارسم بيوت فيها حكايات
من ريحه الناس الطيبه
فيها الحنين للذكريات
وقلوب لبعض قريبه
ارسم كتاب
فيه الفضيله ألف باب
فيه الحروف متفصله
ع الكلام بالمسطره
فيه الجمل متفسره
فيه السؤال سهل الجواب
ولا فيه مجاز ولو فيه تضاد
ارسم حصاد
وناس بتجنى فى حبها
وناس بتردم ع الفساد
وزهور بتطرح كل يوم
وشعاع بيطلع من الغيوم
ارسم شعار الاتحاد
وإيدين بتحضن بعضها
وولاد بتحفر اسمها
بحلمها فى بيان
