انا الانثى
انا نصك
انا اختك
وانا امك
وانا الحضن اللى يوم ضمك
بقيت فجاة كده تنسا
بقيت تتعرى من اسمى
وبتخبى كمان صورتى
وتطلب منى اتنقب
عشان وشى كمان فتنه
بلاش من صوتى تتهرب
وتفرض انه يوم عورة
انا صوتى بقا ثورة
بيفرض كل يوم فكرة
متتحكم كده ف نفسك
وتسال انت ايه بكرة
انا الشيالة لهمومك
وانا الطيعه لمخدومك
وجودى كان سبب قومك
بلاش بالعادة تتنكر
وتتهجم على حالى
وبتدور ف احوالى
بحجت خوفك الكداب
عشان تقفل عليه الباب
كأنى طفله وبتحبى
خلاص فجاة بلا اسباب
انا بعرف اكيد ربى
وحاسه برضه بوجودى
ومش عارفه ومش ذنبى
بتتعدا على حدودى
وتقتل حتى احلامى
وتتحكم ف ايامى
هنا تمشى هناتنامى
خلاص مش قادرة من جهلك
دة شكلك للى يستهلك
مانا كنت زمان اهلك
هجرت وبعت ياخسارة
وبسال نفسى بمرارة
ما تقتلنى بقا احسنلك
خلاص جبروتك الكداب
صنع منك خيال راجل
ومن وهمك بيجرى عذاب
خلاص قولى ده ايه فاضل
مترجع تانى لملمحك
ويمكن انسا احزانى
تدوقنى الحنان مرة
ويمكن جرحى ينسانى
وهفرح برضه برجوعك
وهمسح دمعه من عينى
وهفضل برضه من طوعك
أشيل الفرح لسنينى
