لا عشتها بقشيش
ولا خنت يوم العيش
كِسْوِة رِضَاكِ صبر
لفة حياتى خيش
لا حلمت يوم بنعام
ولا حتى أكلة شيش
ع السطر ماشي تمام
يشهد لي كعب وفيش
توجعنى .. قلبة وش
يراضينى ريق معلش
يئوينى كوخ من قش
واخدانى ليه تلطيش
قلبي المسالم حر
لم ينوى يوم ع الشر
مقدرش أنا ع الهجر
شوق الهوى تحابيش
توب الملامح ود
والحلم كان ع القد
بينى وبينك عهد
حُبِّى كما الدرويش
يا دنيا للأشرار
والتعلب المكار
خدنى لحد الدار
عمرى انتهى ..
بشويش
عشمتى فيا حياة
وبطوق وِضَيّْ نجاة
عشمتى فيا لقيت
ولا حتى عزوة وريش
طاير لا له جناحات
مُغرم أنيني سكات
مرغم على الضحكات
مجبور أعيشها بطيش
دوامة .. بالتساهيل
بتعدى عجل الليل
مشتاق أنا ل نهار
صافى بدون خرابيش
