لو كُنتي ناوية تجَّرحيِ
أو حتى لو هتلَّمحيِ
أنا لسه باقي عالي فات
وبلاش لقلبي تِدبحي
أنا كنت مَعشوقِك زمان
أنا كنت بيتك الأمان
يا ريت نرجع اللي كان
بإيديكي كنتي تطبطبي
حضني اللي كان بيطمنك
قلبي اللي كان بيفرحك
مش حمل نظرات العيون
وعتاب بدون ما توضحي
دى عنيكي مليانه حكايات
هنصحي ليه بس اللي مات
علشان أملنا يبتدي
حاولي تسامحي وتصفحي
لو كنتي قادرة ع البعاد
لو حبنا أصبح رَماد
لو تقدري تدوسي الزِناد
يالا اضربي يالا اقتلي
أنا وانتي كنا قريبين
من بعضنا وحنينين
كنا بنفهم بعضنا
يا ريت يا حبيبتي تقربي
أيامنا معدودة بساعات
هنعيشها ليه صمت وسكات
أنا مهما تسرقني السنين
معاكي بحس إني صبي
جوليت وروميو قررو
ليموتو أو ....يتحررو
وانا قبل روميو بعترف
إن انتي سجني ومعقلي
العشرة بتولد عتاب
واحنا ما بينا ألف باب
وحتى لو من غير دليل
ممكن لقلبي توصلي
ليه حبنا أصبح سراب
متشعبطين فى حبل داب
روحنا فى طريق من غير إياب
والرحلة لسه بتبدي
أنا قلبي ليكي كان كتاب
مفتوح وأمرك كان مُجاب
يا حبيبتي ليه الود غاب
باتمنى إنك ترجعي
باتمنى إنك ترجعي
