مخبي حزني جوايا
ونبرة صوتي مدبوحه
ولسا الآهه في ضلوعي
بتحكي عن سنين عمري
باودع حته من جسمي
بتبعد عني وتسيبني
وبتقول لي ما تزعلشي
وإوعدني
تخلي حلمي يتلألأ
وجاهد حتى يتحقق
حا يبقى جوه في عينيا
يا زهره نبتت فيا
يا شوق نابع من الألفة
ومتدفي بكام غنوه
حروفها جايه من إسمك
يا شمعه في طريق بكره
وسطر أخير في كراستي
وصوره جميله جامعانا
وبروازها
مشاعر بينا لمانا
في كهف الليل أنا مسجون
وأمتى نقابل الفرحه؟
يا ريت في لحظه نتقابل
باداري كتير ومش قادر
لكن صابر
وباتعكز على صمتي
وأنا تايه ما بين فكرة
حيطانها خيوط في توب ذكري
وجسر الحلم قدامي
حواري من تاريخ عتمه
هنا الماضي
هنا الحاضر
وبينهم حلقه مفقوده
منيش قادر
إشارة الوعد بإيدكي
مانيش ناسي بتقصد إيه
ها خلي بالي متخفي
دي إيدي حاضنة أحلامك
وهارسمهم في كام لوحه
وألونهم بأشواقي
في مرجحيه مشاعرنا
ها نذكر طفولتنا
وكل دقيقه عشناها
وافضفض بالبكاء وحدي
عشان طعم البكا راحة
ها قولك أيه
هاروح اتوضي وادعيلك
