الشاعر أحمد حسن عمر يكتب.. جرجس أفندي

جرجس افندي حبيبي وصاحبي
ساكن جاري بقاله سنين
وقت الفرح القاه يشاركني
وقت الجرح أشوفه حزين
واما يشوفني باصلي وأدعي
باسمع صوته يرد آمين
وف رمضان بيراعي شعوري
حتي تقول اننا صايمين
.....
وأما العيد بيهل علينا
ما تفرقش العيد دا لمين
أحمد يجري يهنى ف مينا
بطرس يحضن عم شاهين
(سامية) تقدم كحك لدينا
 (دينا) ترد ( بقمر الدين) 
جنب الجامع تلقي كنيسة
بنتنا مريم أخت ياسين
واحمد زارع غيط مع عيسي
مليان حب وفيه عايشين
مهما يحاولو يفرقوا بينا
إحنا ح نفضل متحابين
فوف شفايفنا تشوف الضحكة
جوه القلب تلاقي حنين
أرضنا واحدة ونبضنا واحد
عمر ما فرق بينا الدين
وعمري م قلت مسيحي ومسلم
علشان كلنا مصريين
اقرأ أيضا| الكاتبة سهام الوهيبي تكتب: عالَم أسوَد!