الرباعيات
سمعت صوت فى السحر بينادى ع النايمين يصحى أهل الهوى وينبه الغافلين املوا كاسات الصفا واتهنوا بأيامكم دنيا زوال تنتهى. وأهل العقول عارفين و أيامنا رح تنطوى وتروح ما ترجعشی.
ويفيد بإيه الندم طبعا.. ما ينفعشي
فى إيدينا لحظة فرح وازاى نضيعها
دی أى لحظة رضا بالمال ما تنباعشى
الغيب ده مين يعرفه أو مين عليه دارى ؟
ده بكره غيب فى الأزل محجوب ومتدارى
من حقى أشوف بهجتى دلوقتى واتهنى
أغنى فيه غنوتى واعزف بأوتاري
معرفشى إيه ياترى مقسوم يكون بكره؟
لابد يوم حا انتهى وأصبح يادوب ذكرى
اسقونى كاس الهنا من قبل كاس نوحى
وإن غبت يوم عنكم خلونى ع الفكره
جيت فى الوجود بالقدر ماحد خد شورتي
وبكره برضه القدر يمسح فى يوم صورتى
من طين لطين يا قدر أصبح وأتمسى
يارب أمرك وجب.. إيه رح تفيد حيرتي؟
أيقظنى هاتف هتف فى النوم وقومنى
وقاللى قوم ابتسم للدنيا وافهمنى
أنا ملاك الأجل مستنى أشوف يومك
إملا حياتك فرح واحذر فى يوم مني
حا نغيب فى يوم من هنا والدنيا هياها
وتيجى ناس بعدنا تفرح بدنياها
دنيا نظمها كدة. بالغدر معروفة
نشرب كاسات غدرها وقلوبنا عاشقها
عايشين فى دنيا الأمل تضحك على عقولنا
ونجرى ورا طبلها وندق فى طبولنا
ويوم يبعت لنا من بعده يوم تانى
ويسوقنا حادى الردى ونروح بمأمولنا
طوت إيدين القدر أحباب ورا أحباب
غصون شباب انطوت. جه بعد منها شباب
وسمعنا طير الصبا بيغنى فوق منا
وفجاة طار واختفى واحترنا فى الأسباب
الدهر ياما كوى قلبى الحزين وضناه
صابرين على قسوته راضيين بكل أساه
ياما نفسى حد اندفن فى القبر يرجع لى
يحكيلى ع اللى حصل بعد الممات ورآه
يا دنيا طبعك عجب مالكيش يا دنيا حبيب
تملى سهمك كده بالغدر فينا يصيب
بندوس تراب تحتنا مخلوط بعضم جدود
ولا حد فينا اعتبر فى طفولته أو فى الشيب
أجدادنا فوق جسمهم ماشيين برجلينا
ناكل تراب عضمهم والدم فى إيدينا
ما احناش وحوش تفترس. لكن كده الدنيا
أحفادنا فوق جسمنا رح تمشى بعدينا
مسكت حفنة تراب م الأرض أسألها
کنتى عيون أو خدود والدهر حولها؟
ضحك فى إيدى التراب وسمعت صوت هامس
بوس التراب وابتسم للأرض ورمالها
راح فين نديم الهوى. راح حبيب القلب؟
راح فين جميل اللمى أشرب معاه الحب؟
ده الحب نعمه لنا فى الدنيا تبعدنا
واحنا اتخلقنا هنا نملا الحياة ونحب
باب الغيوب انقفل على سر رب الكون
وازاى تعوز تفتحه أو تعرف المكنون
عيش فى الحياة وارتضى بالقسمة والمكتوب
وارضى بنصيبك كده تمضى الصعاب وتهون
بستان حياتك طرح أشجار وفيها التمر
إزاى تفوت تمرها وتعيش فى نار الجمر؟
افرح بيومك هنا واشرب كاسات فرحك
ده ای يوم ینتهی مخصوم أكيد م العمر
الروض كساه ربنا بالخضر والألوان
اسجد عليه واعترف بالقدره للرحمن
واملا حياتك فرح ع الخضره واتهنى
دى الخضره دى نفسها حاتعيش لكل زمان
محلا الربيع لو كسا كل الوجود خضره
وكل غصن ازدهى بالكسوة والقدره
القعده تحلى قوى فى الروض وتتهنى
لما الحبيب يسعدك يهدى إليك زهره
خد من حياتك عبر بالعقل وافهمها
خليك بعيد النظر فى الدنيا محكمها
الدنيا لو تحكمك تضحك على عقلك
أحلامها حسره وندم وازاى بتحلمها؟
رق النسيم وابتسم واخضرت الأغصان
حتى البلابل شدت فرحانة فى البستان
انظر جمال ربنا وانسى الهموم وافرح
واسمع نشيد الهنا من شفة الكروان
طول عمرى أحب الصفا واشرب كاسات الفُرْح
عايز أعيش فى الهنا ويطيب أنين الجرح
ده كل يوم ينتهى م العمر مش حايعود
هوه الشجر لو نشف تستنى منه الطرح؟!
باشوف جمال ربنا فى الورد والزهرة
واشوف جمال ربنا فى الغصن والخضره
عابد جمال ربنا والحسن محرابی
يصلى قلبى بفرح للحسن والقدره
فى كل يوم ينقطف من زهر عمرى الغصن
والدنيا سوق يتملى. لكن قوام ينفض
ويلومنى ليه الخلى ويقوللى عيش محروم ؟
عايز أعيش دنيتى بالطول صحيح والعرض
من قبل ما اجى هنا. مكتوب لى خط السير
إن كنت حاافعل أذى أو كنت حا افعل خير
ما لناش خيار كلنا فى الوعد والأفعال
وازاى نحوش القضا أو نطلب التغيير؟
ربى أراد لى اتخلق من طين وسوانى
بإرادته أعيش فى الهنا.. بإرادته حرمانى
لا أقدر أرد القضا ولا أغير المقسوم
واللى طريقه اترسم مالهوش طریق تانی
إحنا فى إيدين القضا زى الطيور فى الجو
بنطير لفوق فى السما وقت الهدوء والنو
وأى طير ينتهى ينزل حضيض الأرض
من غير ياريت أو عسى أو حتى كلمة لو
دنيا خيال للبشر.. بالزيف بتغوينا
وازاى نعيش فى الكدر والهم يضنينا؟
راضيين بحكم القدر.. وإن كنا مش راضيين
نهرب لفين.. والقدر نافذ أكيد فينا؟
رب الوجود والعدم دبر نظام الكون
واحنا العباد كلنا عاجزين نكون ونكون
سبحانك انت الصمد مالناش إله غيرك
الكون لأمرك خضع.. مستنى كن فيكون
الموت علينا انكتب. لازم أكيد محتوم
والعمر مهما اتصل.. لابد يخلص يوم
ماأخافشى موت أو فنا. لكن با أخاف فجأه
ألاقى عمرى انتهى من قبل ما افرح يوم
الدنيا مهما صفت. آخرة نعيمها زوال
غنى على طبلها قبل انعكاس الحال
فكرت قبلك أنا فى الدنيا ولقيتها
يوم ما تصافيك تخدعك والسعد فيها محال
اللى النهاردة اتولد حا يحصَّل السابقين
الدنيا هيه كده وإن عشنا فيها سنين
مفيش خلود للبشر وإزاى تصدقها؟
اغنم ساعات صفوها واضحك على النايمين
عيش فى الحياه منسجم ما تشيلشى هم وغم
وإن شفت ظالم ظلم. حايروح صريع الظلم
نهايتها إيه دنيتك غير العدم والموت ؟
إوعى الحياة تخدعك أو بالضلال تهتم
أيامنا زى الورق بتبعتره الأشجار
وإن طال عليك السكن لازم تفوت الدار
خليك حريص ع النعم وانعم بأيامك
من قبل يوم السفر والحزن والأكدار
فوت الظنون وابتعد عن حيث ويعنى وكان
واغنم ساعات الفرح من قبل يوم أحزان
اللى تلاقيه اندفن فى القبر من ثانيه
ساوى اللى مات واندفن من غابر الأزمان
الدنيا طيف لو ظهر بيزول.. ولو طوّل
فى يوم ماتضحك لنا.. تقدر وتتحول
كالشمس نورها القوى يملا الحياه أنوار
آخر النهار تختفى وتعود من الأول
حاتعيش لإمتى فى أسى وتقول ياريتنى ماجيت
دنياك أساسها عدم مايفيدشى فيها ياريت
ارضى بقضاء ربنا.. ماتخافشى م الأقدار
صاحب الاراده حكم وانت بإرادته مشيت
خليك كبير واحتمل داءك بكل رجاء
حاتلاقى همك ذهب. ولكل جرح دواء
اشكر إله الورى فى العسر والتيسير
هيا حياتنا هنا فى الدنيا حيث يشاء
ع الأرض سير وافتكر فى الدهره والأيام
واسرح بعيد وانشغل واهرب من الأوهام
كان لك حبايب هنا.. راحوا الحبايب فين؟
من بعد نور فجرهم. نايمين هناك فى ظلام
حاتلاقى يوم أربعه من اغلى احبابك
شالوك على كتفهم.. سهم القدر صابك
وتكون نهايتك عدم فى القبر والضلمه
ويجيك ملاك يسألك والرد فى كتابك
لغز القضا والقدر ما عرفنالوش تفسیر
أجيال كتير انضنت فى البحث والتفكير
وبعد طول بحثهم فى حل لغز الكون
عادوا إلى رشدهم.. راضيين بأى مصير
سؤال طواه الزمن من غير جواب مفهوم
ليه ابن آدم أتى.. ويعود وحيد محروم ؟
سؤال حايفضل كده فى عقولنا متحير
واللغز ويا الأزل بیزید همومنا هموم
على الدفوف والنغم يستقبلوا المولود
وبالأنين والبكا بيودعوا الموعود
لا الأمهات أضربت عن خلفة الأولاد
ولا ابن آدم نقص من كثرة الموجود
يا نفسى ليه تحزنى وتخلى وقتك حزن
ورد الربيع ابتسم مليان نضاره وحسن
وكل طير انسجم بالحسن واتهنى
صحاه ربيع الهوى. خلاه يميل ع الغصن
الجسم داب وانضنى من كتر أوهامى
شايف مقص الزمن بيقص أيامى
مصیری بعد العدم معروف ومتحدد
وازای أعيش فى الضنا ومصیری قدامی
قضيت حياتى اجتهد وابحث فى أعماقى
عن حل لغز القضا. واكتب فى أوراقى
وإن طال علىَّ الزمن فى البحث والتفكير
حااروح بجهلى أنا واللغز شيء باقي
مادام وجودى هنا زى العدم سيان
أنا ليه أعيش فى الأسى والحيره والأحزان؟
إن عمرى طال أو قصر إيه رح يضير الكون؟
ومادمت عارف كده. لازم أعيش فرحان
لو عمرى يوم انتهى. باب الرجاء ينسد
كاس الحياه ينسكب بعد الحياه فى اللحد
ما يفيدشى يومها الحذر ولا ينفع التحذير
فى يوم حساب البشر ماحد ينفع حد
معرفشى إيه السبب فى الحيره للإنسان
فيه ناس ضلالهم وصل للشك والبهتان
وناس إيمانهم وصل للرفعه والملكوت
سبحانه واحد أحد يعلم ضلال و إيمان
الناس حيارى هنا مالهومشى بال مرتاح
اللى فى ضلاله انشغل يبحث عن الأفراح
واللى فى ليله سجد لله بقلب وروح
ملايكه تكتب لنا أعمال مسا وصباح
أجسادنا مهما انكست حايكون مصيرها تراب
حاتعود إلى أصلها وتفارق الأحباب
بعد انتهاء الأجل ترجع لأصل الطين
كالنمل دب وسرح ع الأرض فتره وغاب
لو شفت روض ابتسم والزهر فيه فتَّح
انسى الهموم كلها ويا الزهور وافرح
ده الزهر ياما شرب واتغدى من أوصال
أوصال حبايب مضت مالهاش خلاص مطرح
سهم القضا لو نزل، ما ينجى منه هروب
لا المال يحوش الردى ولا يمنع المكتوب
ما يفيدشى غير العمل لو كان جميل طيب
هوه اللى باقى لنا.. يوم الحساب محسوب
الكل رهن القضا.. مستنى وقت الموت
افرح بوقتك هنا قبل الأوان ما يفوت
حاتشيل حمول الأسى ويزيد عليك الهم
وبعد طول الأسى تقفل عنيك وتموت
طول الجدال مضيعه فى الوقت ع الفاضى
حاضر حياتك هنا.. مش بكره أو ماضى
أنفاس بتطلع كده.. يمكن ماترجعشى
لو عشت عيش منسجم وإن مت موت راضى
ملايين كتير ترتحل وتروح مع الأموات
كام من شديد اصطبح. ويا المغارب مات
نبنى القصور بالأمل ونفوتها تنعينا
ولا عبد يوم اتعظ من هادم اللذات
مريت بقبر اتنبش شفت العجايب فيه
إنسان وكان زينا.. دلوقتی شکله کریه
فين العيون ياترى والشفه والأعضاء؟
محاها ليه العدم ولا عادشى فيها شبيه
دنياك ساعات تنتهى زى الخيال والطيف
وتلاقى كل الهنا يصبح سحابة صيف
وازاى تعيش دنيتك شايل حمول الهم؟
وانت عارفها قوى مليانة غدر وزيف؟
يا قلبى ليه تنشغل بالدنيا والفانيه ؟
هموم كتير تنتهی تبعت هموم تانية
يا روحى ليه تقبلى غدر الحياه ليكى
دا كل عمر انكتب باللحظه والثانيه
لو كان بأيدى أنا أو كنت أعرف غيب
ما كنت جيت دنيتى وفضلت عنها غريب
دنيا حياتها تعب.. آخرتها حزن وموت
نفعل ذنوب تنكتب بإيدين (عتيد ورقيب)
نزلت دار العدم. أتعب عليها وأروح
مافيهاش خلاف الأسى ولا فيها غير النوح
وبعد طول الشقا فى الدنيا حااتركها
الجسم يصبح عدم بعد استلال الروح
شفت النعيم والهنا قاصرين على الجاهل
رزق الجهول والغبى جايين له بالساهل
وأهل العقول والحجا عايشين فى دوامه
وإن حد ناح واشتكى يقولوله تستاهل
عجبى عليك يا زمن طبعك عجيب وغريب
تدى الجهول. إنما تحرم أديب ولبيب
وكل نجم الأمل ما يلوح لعينى ضياه
ألقاه بسرعه اختفى ويا السحاب ويغيب
احتار جميع البشر فى كل وقت وحين
طالت حيرتهم زمن ما بين ضلال ويقين
رب الوجود والأزل دبر نظام الكون
سبحانه واحد أحد رب العباد والدين
بدر التمام ابتسم بعد الظلام فوقنا
شفنا جمال طلعته.. من همنا فقنا
بيطل فوق أرضنا ساخر ومتبسم
دنيا بتلعب بنا شاغلانا فى سوقنا
شايل هموم دنيتك. مين رح يشيل همك ؟
حرام عليك ينحرق ويا الهموم دمك
اسهر وعيش وانسجم فى الدنيا واتمنى
بكره تنام للأبد والقبر حايضمك
ارضى بقليلك هنا تلقى الكتير فى الإيد
وعيش لوحدك خلى ترتاح وتبقى سعيد
ده السعد هوه الرضا بالقسمة والمكتوب
أما ان غويت الطمع حاتعيش تعيس ووحيد
ربك عليم مطلع على كل سر دفين
مهما حاولت وحصل هاتروح بسرك فين ؟
خدعت ناس. أى نعم.. لكن محال تخدع
رب العباد.. يعلمك رايح وجاى منين ؟
أهل الوداد والوفا ظاهرين فى مظهرهم
تلقى علامة الصفا بتزيد فى أنوارهم
وأهل الخداع والجفا والمكر خاف منهم
خليك حريص وابتعد واوعاك تعاشرهم
بخت اللى عاش فى الورى قافل عليه بابه
سعيد ورزقه انضمن. بيجيه ويرضابه
راضی بنصيبه كده ولا عمره قال شكوى
وليل نهار فى الهنا والكل أحبابه
الناس ملاها الهوى بالدنيا واتلاهوا
عاشوا فى قصور الترف من جهلهم تاهوا
لو بان فى يوم وانكشف عنهم حجاب الغيب
ما كانوش فى يوم يغرقوا فى الزيف ويتباهوا
قطر الندى لو نزل ع الزهر بيخليه
يتقل عليه ينحنى.. مغصوب ويعمل إيه ؟
والورد بيغطى نفسه بالورق والشوك
علشان يصون دولته ولا حد يقسى عليه
عجبى لعبد انشغل بالمال وألوانه
وعاش سجين الطمع والقرش سجانه
يكنز لغيره الدهب والدنيا بتذله
وتشوف فى وجهه الغضب والبخل عنوانه
مادام نهايتك كده تحت التراب حاتنام
لا فيه حبيب يأنسك ولا فيه عبير أنسام
اصحى مع الفجر بدرى وشم ريحة الزهر
ده الزهر زيك كده. بيجيله يوم ينضام
عاشر غريب ينفعك ويكون حبيب صافى
واترك قريب يجهلك لو كان ما هوش وافى
وإن كان زلال يتعبك من إيد قريب سبه
تلقى الغريب ينصفك ويكون دواء شافي
عاشر كبير يرشدك بالعقل ويزيدك
واوعى الجهول يتعبك بالجهل ويكيدك
اسكب على الأرض بلسم من إيدين جاهل
واشرب سموم الذكى بالعقل حاتفيدك
لو شفت ليلك هجم إسهر على بدره
اسهر معاه وانسجم وانظر جمال فجره
حاتنام فى ليل العدم ويطول عليك ليلك
اسهر فى ليلك هنا ما تخافشى من غدره
عصر الوفاء انتهى ولا عادشى خل خليل
فى دنيا غش وعدم. فيها المحبة قليل
خليك وحيد وابتعد عن صحبة الخلان
أصل النفاق من زمن وارثينه جيل عن جيل
كرهت دنيا الألم والغدر والأكاذيب
بجروح وجرحى اتسع مش لاقى لى طبيب
يارب يا مطلع على طبع كل الناس
نجینی من دنيتك قبل الحظوظ ما تخيب
الدهر ياما جفا واحترت اصالح فيه
قضيت حياتى فى شقا مضطر واعمل ايه
قلبى الحبيب انجرح غدر أحبابه
وعيونى ياما بكت على عهد باابكى عليه
مهما انسعدنا هنا. بعد السعادة زوال
رح تيجى ناس بعدنا تبكى على الاطلال
لو كان فى يوم ينكشف هنا الحجاب ونشوف
حانشوف ساعتها العجب ونشاهد الأهوال
الدنيا دى لو صفت لجدودنا فى الماضى
گان کل حاضر هنا يصبح کئيب فاضی
ولا كنا صلنا الهنا ولا شفنا فيها متاع
أرجوك تعيش دنيتك وتفوتها يوم راضی
لو كل جيل بعدنا يعرف أسى الأيام
كان كل طفل اتولد يختار يعيش فى ظلام
لكن أراد ربنا نجهل مصير الغيب
ونعيش حياتنا فى أمل ونصدق الأوهام
فوت القضاء والقدر حسب المشيئة يسير
واسمع حديث ينفعك يا قاصر التفكير
اقنع بحكم القدر وارضى بقضاء الله
وإن شفت جاهل جهل خليه لجهله أسير
ديك الصباح انطلق على كل سطح فى دار
ساعة ماليله انجلى بالصبح والأنوار
بيقول يا أهل الهوى راح من عمركم ليله
وكل ليل ينقضى محسوب من الأعمار
يا قلبى لو ينتزع توب العناء ترتاح
رح تبقى روح فى السما طاير مع الأرواح
وانت فى علالى السما حاتقول ياريتنى ما جيت ع الأرض لحظة هنا ولا كنت شفت جراح
أيام حياتى انتهت من غير ما أشوف راحه
قضيت حياتى فى شقا والخلق مرتاحه
نهارى حزن وشجن والليل مالوش آخر
وعيونى طول عمرها للدنيا نواحه
أحزانى إيه بعدها غير كتر أحزانى ؟
حايفيد بإيه الندم وتفيدنى أشجانى
دنيا ونظامها كده من قبل مانجيها
واللى كتب وعدنا واحد مالوش تاني
إن شفت طير ع الشجر بيغنى.. خد بالك
واسمع جمال النغم بالحب يحلالك
ده صوت جميل يبعدك عن دنيا أحزانك
رح يملا قلبك فرح والدنيا تصفالك
واجب علىَّ أنصحك والنصح شيء واجب
عيش فى الحياة منفرد ما تاخذش لك صاحب
خليك قنوع واقتصد ما تكونشى نهم أكول
قلبى عليك باانصحك. وإن كنت مش عاجب
الزهد ويا الورع ما يكونشى قول وكلام
وكل زاهد صدق فى الزهد.. يبقى إمام
مادام تبيع دنيتك مخلص لوجه الله
يفتح عليك ربنا وتعيش فى نور وسلام
مستور بتوب الريا. لكن ضرورى يبان
وكل زيف ينكشف وان فات علیه أزمان
ده احنا فى كف القدر ريشة فى مهب الريح
والدهر مهما ابتسم مالهوش ضمان وأمان
خزاف بيصنع خزف على كل شكل ولون
دارت فى إيده الرحا. باانظر إليه مفتون
سألت نفسی ونا با انظر لشكل الطين
الطين ده عضمة غنى أو ساق فقير مطحون ؟
ياللى الشيطان أذهلك ونسيت عذاب النار
التوبه بابها انفتح للعاصى والمحتار
خايف عليك تنتهى قبل المتاب وتروح
تلقى التراب يكرهك يا حضرة الجبار
مريت بصانع خزف. فى إيديه عجينة طين
نازل عليها بأسى من غير حنان أو لين
وسمعت طينة الخزف بتقول له ارحمنى
القسوة ليه طبعكم يا بنى آدمين ؟
قبل الوجود. فى الأزل مكتوبة أرزاقنا
نعصى إله الورى. يغفر ويرزقنا
أعظم نعيم للفتى يرضى بقضاء الله
لو يوم عارضنا القضا. بالغصب حايسوقنا
مادام رضيت بالقضا تفضل سعيد على طول
وإن شلت هم الزمن. همك يزيد ويطول
ده احنا فى دار الفنا مااحناش فى دار تخليد
لو ترضى باللى انكتب. رح تبليغ المأمول
قصور عليها نعب بوم الخراب من فوق
بيقول يامين يتعظ قبل الأوان ويفوق؟
قصور وياما اتملت بالعز والأفراح
دلوقتى فين عزها والعشق والمعشوق ؟
بنحب فعل الأذى ونعيش فى حقد وبغض
ونعادى ليه بعضنا والبعض يأذى البعض ؟
أبريق وكاس شفتهم بيعانقوا بعضيهم
واشمعنى ليه البشر غاوى العداء ع الأرض ؟
إفتح كتاب الزمن واقرا التاريخ ترتاح
حاتلاقى ناس قبلنا عاشوا الحياه أفراح
نالوا صحیح حظهم من قبل ما يموتوا
كام بعد منهم طلع ع الدنيا ليل وصباح
قلبى السليم انجرح والجرح عل وزاد
ومنين أجيب الدوا يشفيه من الأوغاد؟
العمر فات وانقضى ونا فى الحياه جاهل
وكل ما أعرف أنا لغز الحياه.. يزداد
سرى فى صدرى اندفن ماقدرش أجاهر بيه
ما اقولشى يوم شكوتى ولا سر حالى أحكيه
أحسن لى أسكت أنا والسر ما احكيش
ده كشف سرى إن حصل يتعبنى واتعب ليه؟
با اكره وجودى أنا واقول ياريتنى ماجيت
أصحى وأبات بالندم ما بين لعل ياريت
أحداث كتير شفتها من يوم ماجيت فيها
لما برانى الأسى وتعبت وأنهديت
ياريت يارب البشر تلغى الوجود وتبيد
وتعيد وجود البشر من تانى خلق جديد
وتلغی اسمى أنا من خلق هذا الكون
وإن كان إرادتك كده.. تخلقنى عبد سعيد
أردت إنى أتخلق ووجودی متقدر
أمرك على وجب فى الدنيا واتسطر
رضیت بحظی کده. لكن فى قلبى رجاء
تجعل حياتى رضا.. لا احزن ولا اتكدر
أبدعت فينا الصور فى الشكل والخلقه
كسيت جميع البشر بالحسن والرقيه
بنشوف آیات قدرتك فى الجسم والأعضاء
ونشوف جمال صنعتك فى كل ما نلقى
فيه بعض ناس م البشر مرتاح وحظه سعيد
وناس كتير شفتهم. بالفقر عاشوا عبيد
يارب نجى البشر من كل فتنه وحوش
إزاى نكون صنعتك ونعيش فى هم شديد
حياتى راحت سدى من غير ما انول سعدى
أيامى ويا الأسى بتفوت وبتعدى
خايف لا يوم أنتهى قبل انسعاد روحی
وإزاى أرد القضا وازاى أحوش وعدى ؟
قلبى فى صدرى انسجن والسجن أثر فيه
اكمنه طين م الأزل. خجلان يعوز يخفيه
يا قلبى حظك كده صعبان عليه حالك
ونا برضه زيك كده. لكن حانعمل إيه ؟
اللى انكتب فى القدر لازم تشوفه العين
نهرب لفين ياترى وروح ونهرب فين
إرضى نصيبك هنا تصبح سعيد مرتاح
مین رح يحوش القضا عن أمة السائلين؟
لو يوم سعيت للعلا. يزداد عليك اللوم
وإن يوم رضيت بالكسل تسمع عتاب القوم
خليك فى حالك كده وابعد عن المخاليق
وعيش لوحدك خلى ما تكونشى يوم مهموم
لامتى تفضل كده بين الرجاء والخوف
يفزع خاطرنا الشقا لو كان فى لحظه يطوف
لا خل صادق وفى ولا دنيا ليها أمان
يبقى انتهاب لذتك هوه الدوا الموصوف
لو يوم سقاك الزمن كاس العذاب والمر
ماتقولشى يوم شكوتك. خلى القساوه تمر
وافرح وخلى الوتر يصدح بأنغامك
ما تكونشى عبد الزمن خليك فى وضعك حر
حسيت دبيب الفنا بيهز أوصالى
العمر ضاع فى الشقا والفكر مش خالى
خايف يحين الأجل ونا لسه متحير
فى حل لغز القضا. محتار على سؤالى
إملالى كاس الصفا قبل الحياه ماتروح
واسيب تراب دنيتى وأشعر واعيش بالروح
يمكن فى يوم يتصنع من جسمى كاس واتنين
وغيرى يشرب بها ونا فى التراب مطروح
يا ساقى خمر الهوى خليك نديم روحى
إملالى كاس فرحتى من قبل كاس نوحی
أوصيك فى يوم الردى ما تقولشى آه جنبی
خلينى أموت منسجم ما اشعرشى بجروحى
أوصيكوا يا أهل الهوى لو عشتوا ليل بعدى
ونا فرق تراب العدم نايم هناك وحدى
من كاس هوايا اشربوا وافتكروا أيامى
أشعر بنور حبكم يآنسنى فى لحدى
بستان حياتنا طرح أشجار وفيها التمر
إزاى نفوت تمرها ونعيش فى نار الجر؟
نفرح بيومنا هنا قبل الأوان ما يفوت
ده أى يوم ينتهى. مش رح يعود فى العمر
اطفيلى نار بهجتى واسقينى كأس الوجد
خليفى أشوف بهجتى وأفرح وأطول المجد
أيامنا رح تنتهى ذى السحاب وتروح
ما حدش عاش للأبد ولا حد طال الخلد
با قلبی ما انتاش حجر ولا ميت الوجدان
إشرب كاسات الصفا وابعد عن الأحزان
الحب رح يسعدك وازاى تعيش محروم ؟
حرام عليك تنحرم أو ترضى بالحرمان
مالى ومال الضنا والفكر والمتاهات؟
أقول لعل وعسى وأصبح فى هم وابات
مادام نديم الهوى ما نسنى بالصحبة
ما خافشى غدر الزمن ولا قسوة الأوقات
ازاى أنام وأبتعد عن صحبة الأحباب؟
واللى سبقنا هنا. قال الهوى غلاب
دى النفس لو تنسعد بالحب تتهنى
واللى ماداقشى الهوى يفضل فى نوح وعذاب
قلبى الحبيب انضى مشتاق لحسن الغيد
وصدرى ضاق بالألم. عايز يقول ويعيد
وأزاى أموت م العطش ونا جنب منى زلال
مقدرش أطبق الأسى وافضل لوحدى وحيد
لو أى يوم انقضى من غير ما احب واتوب
أقول لقلبى انحرق فى الوعد والمكتوب
ده الحب أجمل قدر للقلب لو داقه
اللى ماداقشى الهوى مالوش وجود محسوب
زهر الربيع له زمن يخلص ويدبل فيه
واحنا كتاب عمرنا لازم فى يوم نطويه
والهم كالسم يقتل. وأنت ليه ترضاه ؟
لو دقت كاس فرحتك.. همك حاتقضى عليه
لو كاس هنايا اتملا من إيد حبيب جنبى
وديوان قصايد جمع أشعار تفيد قلبى
ما يهمنيش الشبع لو حتى نص رغيف
مادام حبيبى سمح يملا كاسات حبي
فين الطهور ياترى عف الأيدين والقلب ؟
الناس خلاص ودعت إسم الوفاء والحب
اسقونى كاس الهوى خلونى اتهنى
وإن ضل قلبى وغوى. ربك غفور الذنب
ياساقى هات خمرتك واسقينى كاس فرحى
يمكن لعل وعسى. بالكاس يطيب جرحى
نفسى خلاص أصبحت بالحزن مقتوله
والنفس لما انضنت هد الزمان صرحى
أبريق خمورك صفا بان الصفا حواليه
إسقينى خمر الوفا واروى الفؤاد واشفيه
مادام لقيت الجفا دلوقتى طبع الناس
مالى ومالهم بقى. وأرضى بطباعهم ليه ؟
هات الكاسات صبها. خلينى أنس الهم
دی النفس من همها ما بقتشن يوم تهتم
يمكن أطول نشوتى وأنسى الهموم لحظه
طول عمرى أشرب أسى واتمص منى الدم
لو كل نفس ارتوت شهد الشراب تفرح
والروح فى دنيا الهنا ويا الجمال تسرح
دى الدنيا فيها الهنا ويا الضنا والآه
فوت الآهات والضنا.. خد فى الهنا مطرح
نديم حياتى حضر واحلو جو الليل
يسقينى كاس الهوى ويميل على واميل
ويمر ليلنا فى صفا من غير ما نشعر بيه
والصبح يطلع لنا أبيض وشكله جميل
اسقينى كاس الفرح واشجينى بالأشجان
قلبى الحزين انجرح. عايز يعيش فرحان
ده الكاس ده منى أنا. من طين جدود سابقين
والبلبل اللى صدح. سمعوه جدودی زمان
صفین کئوس شفتهم وسمعت منهم همس
بيقولوا فين ياترى صانع كاسات الأمس؟
صاغت إيديه شكلهم. لكن إيديه فينهم؟
طوتها إيد الفنا تحت التراب فى الرمس
زهر الرياض ابتسم للشمس فى طلوعها
وبان عليه الفرح بالشمس فى رجوعها
يحلالى صوت الوتر ساعة غياب الشمس
أسمع ونا منسجم واعرف أودعها
لو يوم سقانى الردى كاس الممات وارتحت
وشربتوا كاس الهوى ونا وحدى نايم تحت
ما تشغلوش مطرحى ولا حد يقعد فيه
دنا قلبى ياما رقص ويا الجمال وفرحت
روض الربيع اتملا نوار وفل وزهر
صب الكاسات فى العلن ماتخافشى فعل الجهر
بكره الربيع ينتهى واحنا كمان هنروح
وازای نفوت حظنا ونعيش فى حزن وقهر
یاورد لما انظرك. با انظر خدود الغيد
وانت يا كاس الهنا. فيك السعادة تزيد
وليه يا حظى كده غيرت ليه ودك ؟
وانت اللى كنت الوفى وقت الزمان ما يكيد
راق الزمان وانجلا صبح اجمال والنور
صب الكاسات بالفرح واحرق قصادى بخور
واصنع رباب النغم من غصن عود فواح
نسمع أغانى الهنا والكاس عليا يدور
بالكاس يطيب الألم واصبح سعيد فرحان
ونا ليه أعيش فى التعب والهم والأحزان
يا ساقى هات القدح واسقينى واشجينى
وقوللى وقتك صفا. إشرب كمان وكمان
لو انتشيت تفتكر انك بقيت فى خلود
تشعر صحيح وقتها انك صحيح موجود
ده الحزن ويا الأسى بيقصروا الأعمار
واحنا أكيد كلنا حانكون طعام اللدود
سارع ودوق لذتك قبل المنون ما يجيك
واطوى الليالى فى هنا لاتفوت عليك تطويك
ده الغصن فوق الشجر يطرح بتقليمه
وانت ان غصونك ذوت تلقى الزمان يفنيك
راح الظلام وانجلا والفجر شأشأ نور
ناولنى كاس الصفا أشرب واعيش مسرور
ماحد فينا ضمن حايعيش لصبح جديد
ده غيب وعنا احتجب عند الأله مستور
أجمل ساعات الفرح بيزينها كاس مليان
وزهر عاطر سرح بالعطر فى البستان
عجبی لساقى ارتضى بالمال يبيع الكاس
ومهما باع واشترى مش رح يكون كسبان
اشرب كتير وانتشى واهرب من الأيام
ترتاح فى دنيا الشفا لو عشت فى الأحلام
ده الصاحى فوق أرضها يفضل حزين على طول
واللى بتوه ينسجم ويعيش فى نور وسلام
طلبت دنيا الصفا ورضيت بمكسبها
كم قبل منك تعب واضطر يوم سابها
اسهر فى ليلك هنا على رنة الاعواد
دى الفرصة لو تنتهى ماتطولشى تكسبها
کروان جميل انسجم فى الروض وغنالى
والكاس قصادى اتملا بالحب أوحالى
أقول أغانى الهوى واشرب كاسات الحب
وازای أفوت الهنا واغرق فى أوحالى؟
الكاس ده جسم اتخلق من جسم إنسانى
أرواح حبايب سرت فى طينته من تانى
ازای عایزنی انحرم من لمس كاس غالى
ده الجاهل اللى انحرم عاش عمره وحداني
عيش فى الحياه وانطلق ويا الشراب والناس
واقعد فى روض الهوى واسمع رباب أناى
دی الدنيا مهما صفت لابد حاتسيبها
وتشوف ملاك الأجل فى عز فرحك جاي
إن دار عليك القدح إشرب وخد نايب
وإن لام جهول مدعى خليه غشيم غایب
لو كان عذابك قدر. لا بد حايطولك
سواء شربت الطلا أو كنت شيخ تايب
خمری عصير العنب بأيدى صفيتها
كاسات محبه وهوى بالحب صفيتها
عصير ما غابشى سنة ولا شهر أو شهرين
اللى يخاصمنى اصلحه والدنيا صافيتها
أجمل ساعات عمرنا تحلو بالاحباب
نسمع أغانى الهوى على شد وعود ورباب
ونشوف جمال الخزف من بعد ما اتحول
من طين جدودنا صبح دلوقتى كاس لشراب
مين اللى قال خمرتى من خمرة الحانه ؟
سكران بخمر الهوى. مش خمر جمدانه
سكران صحيح أى نعم والحب خد عقلی
العقل صاحى وروحى الهايمه نشوانه
خمرى جعلنى ارتفع عن دنيا فيها الناس
بروحی طلت السما بالنشوة والإحساس
تركت طين الجسد وصبحت زى الطير
اطلع لفوق وارتفع عن واقع الأحداث
أنا فى حياتى كده مكشوف لعينى حجاب
نشوان بخمر الوهوى والحب والأحباب
لا يوم بديت شكوتى ولا قلت آه للناس
دی الشكوى للى اتخلق زيك مرار عذاب
يا من تلومنى. كفى.. ما اقبلشى منك لوم
أنا كاسى كاس الهوى. مش زى كاس القوم
رب العباد مطلع على كل سر وجهر
خلى الملام ينفعك وانصح وعيش محروم
تنصحنى ليه ياترى وتقول كتير وتعيد؟
خلينى فى نشوتى ويا الأمانى سعيد
وفر نصايحك بقى ما تقولشى وتطول
سبنى أنا لربنا يعلم بحالى أكيد
لابس مسوح رهبنة وتمص دم الناس
وتقوللى توب وارتجع عن شرب هذا الكاس
ياللى ادعيت الورع والزهد والتقوى
الزهد عايز عمل بالفعل والإحساس
بتلومنى ليه ياترى وتقوللى توب لك يوم
التوبة إيه شرطها.. عايز جواب مفهوم
أربى دقنى أنا وامشى وأشيل سبحه؟
دى التوبه حب وحيله بالواحد القيوم
نفسى اللعينة غوت ومشيت فى تيارها
وذنوبى مهما افتكر، مقدرشى أحصرها
خجلان ياربى قوى من نفسى يوم العرض
لكن فى قلبى أمل طمعان حاتغفرها
أن كان غوانى الهوى. عندى أمل فى الله
سبحانه واحد أحد. مالناش رحيم إلاه
طمعان وعندى عشم فى الرحمه والجنة
فى السر ويا العلن با اشهد واقول الله
يا نفسى ليه الأسى ع اللى حصل أو كان
ذنبك خلاص انكتب ما تغفروش أحزان
بالحب دوقى الرضا من عفو رب الكون
لو ذنب قد الجبل. رب العباد رحمن
قالوا حساب ربنا حايكون شديد جبار
واللى عصاه ينحرق بعد الحساب فى النار
سبحانه أرحم بنا من أم ع المولود
والعبد مهما ابتعد رب العباد غفار
ياذى الجلال والنعم يامبدع الأكوان
عبدك ضعيف ياقوى من كل شيء خجلان
غوتنى دنيا العدم وغرقت فى الأوحال
وانت فى إيديك النجا والرحمه للإنسان
فى كل لحظة أسألك يارب تكرمنى
ما احتاجشى يوم من أحد ولا حد يألمنى
هيألى لى رزق برغد يجعلنى أتهنى
وقبل ما اسأل أحد م الخلق ترحمنى
خلقت دنيا العدم يارب تشغلنا
تغفر كثير عننا واحنا مازلنا
نجينا من دنيتك واحمينا من زيفها
واخرجنا منها برضا يارب واقلنا
سبحانك أنت الصمد أبدعت صنعتنا
والدنيا لعبت بنا بالغش والفتنه
مالناش خلافك أحد فى الدنيا والآخرة
إنت الرحيم يا أحد. حوش عنا دنيتنا
القطرة لو تنفصل م البحر تعرفها
انت اللى تعلم بها وانت اللى تكشفها
وانت اللى تعلم بنا فى السر والنجوى
عايشين فى دنيا الهوى يغرينا زخرفها
خالق طباع البشر من قبل تكوينهم
قبل الجمال فى الصور بالعقل. بتزينهم
وان يوم نفوسنا غوت فى الشر واتمادت
تنصر نفوس البشر ع الشر وتعينهم
أخفيت علينا هنا فى الدنيا أسرارك
كل شىء صنعتك ناطق بأنوارك
آيات كتير فى السما والأرض تشهدك
إنك إله الورى خاضعين لأقدارك
بعد العذاب والتعب يارب نفسى أرتاح
إفتح لى باب الهدى واهدينى للإصلاح
دى النفس لو ترتوى بالتقوى تسعدنى
وإن دقت طعم الرضا.. كل الهموم تنزاح
بكيت بدمع الندم والدمع كان نواح
النوم فى عينى انحرم والفكر بات سواح
أشوف ذنوبى انحسر وابكى واتندم
ضميرى زى الأبر وازاى أعيش مرتاح ؟
يارب ذنبى جبل راقد على عمرى
ينزاح بأيه الجبل والأمر مش أمرى؟
الأمر أمرك وصاحب الأمر مين غيرك؟
فى كل لحظه أسألك تشرح دوام صدری
أدخل بأيه جنتك وذنوبى حایشانی
غرقان فى بحر الخجل. موبوه بعصیانی
طمعان فى عفوك أنا يارب سبحانك
لطفك بعيد انحرف.. دى النفس عاصیانی
إن جل ذنى وكبر. طمعان فى إحسانك
تلطف فى ساعة القضا يارب سبحانك
العبد مهما غوى. عاجز مالوش حيله
تايه فى بحر الخجل يتمنى غفرانك
عبدك ضعيف فى العمل يارب ومقصر
سالت دموع الندم عن خوفى بتفسر
ذنوبى مالها عدد. مقدرشى أحصيها
وليل نهار أفتكر فى ذنوبى واتحسر
فى كل وقت أسألك يارب تحفظنى
ماسك فى خيط الأمل والوجد
ايقظنى قصدت باب رحمتك ما تردنیش خايب
شفت العجيب والعجب والدهر أوعظنى
سبحانك أنت الصمد يا عالم الأسرار
مالناش خلافك أحد رب العباد ستار
قاصد رحاب رحمتك راجع إليك بالخوف
أنت مجيب من دعا. وأنت رحيم غفار
عبدت ذاتك أحد فى الجهر والخافى
قلبى إليك اتجه مؤمن سلیم صافی
مين غيرك يحوش النقم اللطف والرحمة
فى الشدة انت الرجا من كل داء شافی
قصدت باب رحمتك ونا عبد با اتلهف
العقل ضل وغوى والجسم كام أسرف
راجع إليك بالندم والدمع والتوبة
سبحانك انت الصمد فى أمورنا تتصرف
على قد ما اقدر عبدتك وأنت عارفنى
وإن كنت جاهل. بنور العلم عرفنى
إنت إله الورى سبحانك العالم
ظلمت نفسی وطول العمر خوفنى
يا نفسى لا تقنطى وتعيشى فى الاحزان
أمرك وأمرى اتعرض ع الواحد الديان
هوه اللى أعلم بنا من غير ما نتكلم
يسعدنا بالمغفره والعفو والإحسان
اقرأ ايضاً | رحيق السطور : تاريخ الطيران فى مصر
نقلا عن مجلة الادب :
2023-3-18
