نفى المطرب الشعبي سمسم شهاب، الأخبار المتداولة حول اعتزاله الغناء، ووصفه للفن بالحرام.
وقال في بث مباشر، عبر صفحته الرسمية على موقع "فيسبوك": "أحد الصحفيين سألني بيقولي الفن وإلى آخره قلتله مش راضي عن الوضع اللي حاصل، قالي وبتهاجم بتوع المهرجانات وبتدعو للفن الكويس، قلتله آه طبعا، قالي ما انت بتغني في ملاهي ليلية، وكان ردي" أنا مجبر إن شاء الله أحاول أبعد، فقالي ده حرام قلتله لو هنتكلم عن الحلال والحرام كتير من الائمة حرموا الغناء وده المشروع المستقبلي اللي بفكر فيه".
وتابع: "ده موضوعي اللي جاي عايز بس أقف على أرض صلبة عشان مبقاش حرقت نفسي وخسرت حاجات كتير جدا، قمت لاقيت مواقع كتيرة وكبيرة بتكتب إني بعتزل الفن نهائيا، بس الحقيقة إن ده قرار ناوي أخده في المستقبل، فيه حاجة في دماغي عايز أعملها عشان لما ابعد أكون واقف على أرض صلبة عشان مرجعش تاني".
وأوضح سمسم شهاب: "ظروف الحياة صعبة على الكل.. حبيت أوضح إن الكلام ده كلام مش صحيح وخبر غير صحيح، وللأسف زعلان من الصحفي جدا جدا مش عارف ليه عمل كده وواخد على خاطري جدا منه، أنا بحترم جدا الصحفيين وبتعامل بكل احترام وهذا ما يستحقونه والمفروض يحصل، لكن المفروض التصريحات متتحرفش".
