نشر الفنان عمر خورشيد، عبر صفحته الشخصية علي موقع الصور والفيديوهات "انستجرام" صورة من مشهد له مع الفنانة يسرا من فيلم "ما تيجي نرقص".
وعلق عمر خورشيد على الصورة: "أهو المشهد دا هو سبب وقف حالي لحد دلوقتي.. مصر كلها حسدتني ولسه بتحسد فيا".
وقال عمر خورشيد في تصريحات خاصة لـ«بوابة أخبار اليوم»: «أنا موجود وبشتغل وبحضر لأعمال جديدة وهناك فيلم باصوره، وخلصت بالفعل 3 أفلام بس لسه متوزعوش ودي خطة توزيع وكمان دخول كورونا بس الحمد لله كل ده انتهى لكن اتسبب في تأجيل طرح كل أفلامي ولما الأفلام بتتأجل بتاخد دورها بقى».
وعن اختفائه بعد نجاحه في فيلم «كاريوكي» الذي قام ببطولته قال: «أصابتني آفة الغرور بدون كبد وبدن مماطلة، وكنت باعتذر عن الشغل وبتكبر على الشغل ودي رسالة مني لكل فنان شاب في بداية طريقه عمرك ما هتكبر لو اتغريت، وانا قدامك أهو كنت نجم والكل كان بيجري ورايا بقيت أرفض الشغل قالولي أقعد في بيتك».
وقال عمر: «عملت دور بطولة مع دوللي شاهين في فيلم عيد جواز، ومع ويزو فيلم ويزو سكول، وفيلم مسخ، لكن لسه ماخدوش دورهم في العرض والتوزيع، ودي أدوار بطولة، وحالياً بيتعرض ليا مسلسل "وجع البنات" ودا بطولة وفي دور في فيلم "براءة ريا وسكينة" لأنه يعتبر بطولة جماعية، وفي عمل تاني مش هقدر أتكلم عليه دلوقت لحد ما يدخل في الجد».
وعن ذكرياته عن رمضان قال: «في ذكريات كتيرة قوي لكن إحنا نسينا الهدف الأسمى من رمضان وبدل ما كنا بنتنافس على العبادة والصلاة ومين قرأ قرآن أكتر بقينا نتنافس على مين شاف مسلسلات أكتر، وأنا مش بأقول منشوفش مسلسلات بس بلاش تاخدنا من المعنى الأساسي لشهر رمضان».
وعن ذكرياته مع عيد الأم قال: «كان عندي بدل الأم 3 خالتي ومامتي وجدتي، فكان عيد الأم بالنسبالي خراب بيوت، ودلوقت أنا كبرت وبقيت أشتغل وبقى عندي مامتي وخالتي ومراتي هما اللي بيفكروني، هتجيب لنا إيه في عيد الأم، يعني خراب بيوت عيد الأم طول عمري».
وأكد في نهاية تصريحاته بأنه من عشاق «أخبار اليوم».
اقرأ أيضا| شريف رمزي يكشف تطورات الحالة الصحية لشقيقه: مازال في غيبوبة
