بقلم: محمد الحداد
كل شيء وله ثمن، بس أغلى ثمن ممكن تدفعه هو أيام عمرك فركز كويس أنت بتضيع وقتك فين وعلى مين، عشان متلاقيش العمر جرى بيك وضيعته على حاجات متستاهلش أصلاً
وخليك فاكر كويس وفاهم كويس وعارف كويس ان الطيّب مش عبيط واللى دمعته قريبة مش ضعيف ، وإنك لما تكون إنسان حسّاس وحنيّن وقلبك رقيق دى أعظم حاجة ممكن تبقى عند إنسان فى الدنيا ،نعم ممكن تتعب شوية بسبب تصرفات بعض البشر لكن كفاية إنك تكون مع اللى وصفهم سيدنا النبي صلى الله عليه وسلم وقال (قلوبهم مثل أفئدة الطير) وتدخل الجنة بغير حساب والسبب بس رِقة قلبك
يا رب لا تصيبنا بمرض
يارب لا تشقينا بولد
يارب لا تسلط علينا أحد
يارب نجنا من شر النفاثات فى العقد ومن شر حاسد إذا حسد يا رب العالمين
وخليك فاكر ان الموت دائما يختار أفضل ناس فينا، لأنهم نجحوا فى الامتحان مبكراً.. فلا داعى لوجودهم
فى وقت تحصلك حاجات فى حياتك مش مفهومه خالص ناس تسيبك وتخذلك وتقل باصلها معاك من غير اسباب .. شغل يتعطل .. احلامك تتأجل .. ابواب تتقفل فوشك فجأه تحس ان حياتك بتتلخبط وكل حاجه نفسك فيها بتروح !! .. يا بختك لأنك هتشوف العجب فى حياتك
المشكله اللى لقيت نفسك فيها ربنا هيكون معاك وجنبك
عارف البحر اللى نزلت فيه هيتشق وتشوف فرعون قصادك بيغرق بمركباته وجنوده !!
الحوت اللى بلعك هيعلمك ترفع ايديك وتصرخ لربنا
كل حاجه بتحصل ف حياتك مقصوده كل اللخبطه اللى انت عايشها دلوقتى نهايتها فرحه وخير وعوض اكبر مما تتخيل
اصبر واطمن ..ربنا هيفاجئك قريب جدا هو عارف كويس هتفرح ب ايه
غمض عينك .. وقول « وأفوض أمرى الى الله».
