قالت رحاب جمعة لاعبة فريق اليد بنادي سان جينيان الفرنسي السابقة على البيان الصادر اليوم الأربعاء من جانب الاتحاد المصري لليد بعد استبعادها من المشاركة في البطولة الإفريقية لكرة اليد للسيدات التي تقام في السنغال في 9 نوفمبر المقبل .
وقالت رحاب جمعة عبر صفحتها الرسمية بموقع التواصل الاجتماعي فيسبوك
ردًا على بيان اتحاد كرة اليد ، تضارب تصريحات الاتحاد تؤكد صحة موقفي.
واضافت أن اتحاد كرة اليد أصدر بيان عشان يوضح سبب استبعاد المحترفات من المنتخب وقافل التعليقات على الصفحة لأنه مش عايز يسمع صوت غير صوته.
وتابعت : بتاريخ ١ /١٠ / مدرب المنتخب المصري لكرة اليد للسيدات قال "الوقت ضيق ومش هلحق اعمل تجانس بين اللاعبات وانه المحترفات بالتاكيد لهم فرصة مستقبلا" ( الفيديو في التعليقات)، وبالمناسبة هو تجاهل الحديث معانا ومسألش هل نقدر ننضم للمعسكر قبل فترة التوقف الدولي ولا لا علما أني كلمته اول شهر سبتمبر وتجاهل الرد على الرسائل يعني نية استبعادنا مبيتة مش قصة ضيق الوقت.
واضافت رحاب جمعة : بعدها كابتن ايمن صلاح قالك مستواها الفني ضعيف رغم انه لم يطلبوا مني فيديوهات ماتشات ولم يستدعوني في معسكر للوقوف على مستوايا وبعدها قالك أنا حر، مرفق الخبر في التعليقات.
وتابعت رحاب جمعة قائلة: رجع الاتحاد في بيانه اللي صدر من شوية قالك احنا عايزين محترفات صغيرات في السن يعني بيلمح أنه مش عايز المحترفات اللي في فرنسا ، هنا الاتحاد بيضلل الناس يعني كرة اليد تقدر تلعب طول ما مستواك الفني والبدني كويس، هقولكم مثال نجمة منتخب تونس الاول الكابتن منى شباح اعتزلت وهي عندها ٤٠ سنة الاعتزال تقريبا من شهرين وبالمناسبة هي كانت قادرة تكمل وتواصل اللعب لكن هي اعتزلت لظروف خاصة بيها .. للعلم منى شباح ونجمات منتخب تونس والكونغو والسنغال بيلعبوا معايا درجة ثانية في الدوري الفرنسي لكرة اليد ( تونس والكونغو في بطولات افريقيا الاخيرة علطول في المربع الذهبي)
واضافت رحاب جمعة تصريحاته قائلة : الدرجة الثانية اللي اتحاد كرة اليد فاكر أني هتكسف منها لا بالعكس ده أقوى من الدوريات العربية والافريقية والاسيوية ومعانا لاعبات في منتخبات أوروبية كبيرة، الحاجة التانية اللي كل الناس لازم تعرفها وهو أنه عدم وجود احتكاك دولي خلال عشر سنوات ده بيكون عامل معرقل لمسيرة اللاعب يعني الاندية في اوروبا بيقولك اخد لاعبة عندها مشاركات دولية مستمرة زي تونس وانجولا والكونغو وبلاش اللاعبات اللي معندهاش منتخبات يعني احنا ذنبا في رقبة اتحاد كرة اليد وعليه أن يجلد نفسه لعدم تشكيل منتخب للسيدات لانه ده تسبب في اعتزال لاعبات متميزات جدا.
واكدت رحاب جمعة انه بفضل مجهودها وموهبتها أنها ما زالت مستمرة في أوروبا متابعة: أحب أقول لحضرتك أني أقدر أكمل في الملاعب عشر سنين كمان لانه كرة اليد طول ما اللاعبة المستوى الفني والبدني تمام تقدر تلعب حتى بعد سن الأربعين.
وذكرت رحاب جمعة:- الاتحاد بيقول عملنا منتخب للسيدات من مواليد ٢٠٠٢ و٢٠٠٤ وانهم هيكتسبوا الخبرات من الاحتكاك الدولي وده تناقض عجيب إزاي عندك لاعبات محترفات عندهم خبرات طويلة وقادرين ينقلوها للناشئات في مدة زمنية ليست بالطويلة وتقول لا اصلهم كبار في السن.
واختتمت رحاب جمعة تصريحاتها قائلة : اللي كاتب البيان بيناقض كل التصريحات اللي الاتحاد قالها سواء على لسان رئيس الاتحاد أو مدير المنتخبات أو المدير الفني
أقرا ايضاً|
