لعبت الصدفة دورها الكبير فى كشف الستار عن موهبته المخفية، وفتحت له باب العالمية من أوسع أبوابه حتى أصبح أحد كبار المصورين فى العالم، إنه المصور العالمى شادى عصام، 27 عاما، حاصل على بكالوريوس سياحة.
بدأ حياته المهنية بكاميرا بسيطة نجحت فى توثيق حياة المصريين فى الشارع لتكون مرجعية للأجيال القادمة، وفى وقت قصير نجح عصام فى حصد 200 جائزة عالمية، من 45 دولة فى مسابقات التصوير الدولية، كما حصل على 35 ميدالية ذهبية ضمنها خمس ميداليات ذهبية من الاتحاد العالمى للتصوير الفوتوغرافى FIAP.
لم يتوقف الأمر عند هذا الحد، بل حصل أيضًا على سبع ميداليات ذهبية من الجمعية الأمريكية للتصوير الفوتوغرافى PSA، كما أهلته هذه الجوائز للحصول على لقب (A.NPS) ARTISTE ) وهو اول مستوى فى الألقاب من منظمة التصوير الفوتوغرافى فى قبرص، ولقب (A.APS) ARTISTAN و (G.APS) GENIUS وهو ثانى مستوى فى الألقاب من منظمة التصوير الفوتوغرافى فى بنجلاديش، وصنف الثانى عالميا كأفضل شاب تحت سن 21 سنة فى واحدة من أهم مسابقات التصوير فى ألمانيا 2016.. وقام بتحكيم مسابقة من اهم واشهر المسابقات العالمية فى روسيا 35awards عام 2018.
يحكى شادى للأخبار «بدايتى مع التصوير كانت صدفة فى اولى ثانوى بكاميرا ديجيتال بتاعت واحد صاحبى بصور صحابى والصور عجبتهم وانا اتشديت للموضوع بدأت أستلف منه الكاميرا أصور بيها كتير لحد ما قررت انى اكمل واشتريت اول كاميرا semi professional». 
وتابع «اشتريت اول كاميرا profissional وكانت غالية جدا ساعتها 2014 لكن والدتى ساعدتنى طبعا ووقفت جمبى فى كل ده لحد ما قدمتلى فى نادى تعليم تصوير عشان اخد دبلومة فى التصوير ومن هنا بدأت ادرس واتعرف على انواع تصوير اكتر على المسابقات واول مسابقة قدمت فيها كانت مسابقة تابعة لنيكون والصور وصلت للمرحلة الأخيرة وتم طباعتها ونزلت على صفحة نيكون وكان انجازا بالنسبة لى كبيرا جدا ومن هنا حبيت المسابقات وكملت لحد 2017 لأن 2018 -2019 دخلت جيش».. أما عن أكثر أنواع التصوير التى يحبها قال المصور العالمى «اكتر نوع تصوير بحبه وهو اللى اخدت بيه معظم الجوايز الـ street photography تصوير الشارع وتصوير الوثائقى بحب أوثق حياة الناس وبحب تصوير الشارع، واكتر الأماكن اللى صورت فيها: رشيد-كفر الشيخ-البرلس–دسوق.
كما يبذل شادى جهودا كبيرا فى الترويج للأماكن السياحية المصرية، فيقول «انا بصور كتير للإسكندرية وصورت فى رأس شيطان وسانت كاترين، وصورت لاندسكيب، لكن نفسى جدا اشتغل فى حاجة تابعة للسياحة وتكون صورى عن اماكن اكتر فى مصر عشان التصاريح واقدر أصور بشكل اكبر وعرض صورى فى أماكن اكبر».
واختتم شادى كلامه قائلاً «نفسى اكمل فى المسابقات وأوصل لمراكز أحسن، ونفسى الناس تشوف شغلى انا معايا جوايز كتير وحققت انجازات كتير باسم مصر ومش واخد حقى ومحدش عارفنى لسة للأسف».
