رد الفنان أكرم حسنى على اتهامه بسرقة كلمات أغنية "للّى" للكينح محمد منير، التى طرحت أمس الأربعاء، من قبل الشاعر عادل صابر، ولجوء الأخير للقضاء لاتخاذ الإجراءات القانونية .
وجاء فى رد أكرم حسنى على صفحته على "فيس بوك": قريت من شوية بوست بيتهمنى بسرقة كلمات أغنية (للى) من شاعر من جنوب مصر الحبيب وبعدها أكتر من صحفى كلمنى بيطلب منى رد على الاتهام ده.. فخلونى أوضح كذا نقطة :
1 - كل الحب والاحترام والتقدير لكل موهبة فنية بتقدم فن يحترم الجمهور وجنوب مصر خرجلنا شعراء وأدباء كتير على رأسهم الخال الأبنودى رحمة الله عليه.
2 - أؤمن بحقوق الملكية الفكرية كما أؤمن بأن السرقة الفنية تصنع نجاحا مؤقتا.
3 - تشابه جملة من الأغنية التى تتكون من 12 بيت مع جملة للشاعر لا يعنى السرقة وإنما توارد الأفكار أمر طبيعى.
4 - لما كتبت الأغنية كانت مكونة من 20 بيت اختار منهم الكينج 12 بيت وتم تسجيلهم فمعتقدتش اللى كتب 20 بيت هتقف معاه فى جملة عشان يسرقها.
5 - أنا بكتب أغانى بقالى أكتر من 8 سنين من خلال برامج ومسلسلات وأعمال فنية قدمتها وكنت على سبيل المثال فى أغانى برنامج أبو حفيظة قبل ما بستخدم لحن أى أغنية فى البرنامج برجع لجمعية المؤلفين والملحنين وأسدد الرسوم حفاظا لأصحاب حقوق الملكية الفكرية.. ف اللى يعمل كدة بيتهيألى صعب يحط نفسه فى موقف زى ده.
6- أنا مهنتى الأساسية ممثل وبحب صناعة الأغانى من باب الهواية ف أنا مش محتاج أسرق عشان أعمل رصيد لنفسى كشاعر.. أنا بعمل ده بحب.
7 - وأخيرا.. أنا كتبت البوست ده مش دفاعا عن نفسى ولكن لاحترامى للجمهور المحترم اللى بيثق فيا ف حبيت أوضح له.
وكان الشاعر عادل صابر اتهم الفنان أكرم حسنى، بسرقة كلمات أغنية "للّى" للكينح محمد منير، وقرر الأول اتخاذ الإجراءات القانونية ضد أكرم حسنى واللجوء للقضاء، كما أن القضية ستطرح قريبا أمام القضاء للحسم فى الموضوع، دون تجريح أو هجوم على أحد، بحسب قوله.
