قال الفنان مدحت صالح، إن أغنية تتر مسلسل "راجعين يا هوى"، كانت قرفتها حلوة، فهي من كلمات تامر حسين وألحان عزيز الشافعي اللي أعمالهم دايما قريبة من قلوب الناس، وهما ذاكروا حدوتة المسلسل وقدروا يصيغوها في أغنية كويس أوي.
وأَضاف "صالح"، خلال مداخلة هاتفية لبرنامج "فن مشكل"، الذي يذاع على "شعبي إف إم"، أن "عزيز الشافعي من الملحنين القليلين اللي بيريح أي مطرب بيشتغل معاه، أما خالد النبوي عشرة عمر وصديقي واشتغلنا مع بعض زمان في فيلم (إحنا ولاد النهارده)، وخالد من النجوم اللي بتقدم فكرة تفيد الناس ومواضيعه مميزة".
وعن مدحت صالح كممثل قال: "بحس إني ضيف على زمايلي وحبايبي وأصدقائي في التمثيل، وبرتاح أكتر لما بحس إن شغلتي الأساسية هي الغناء".
وتابع: "أما أغنية (ما بحبش حد يصيحيني) ليها قصة وهي إني كنت قاعد مع أصدقاء دراسة ولينا ذكريات مذاكرة مع بعض وكانت أهم حاجة وقتها النوم.. فلما عمرو الشاذلي الملحن بعتهالي هو ومحمد شفيق الموزع وتأليف إيهاب عبد العظيم.. حسيت كأنهم كانوا سامعين إحنا بنرغي في إيه والأغنية دمها خفيف وحبينا نرسم الابتسامة لولادنا عشان الارتباك والتوتر في الامتحانات".
واختتم الفنان مدحت صالح قائلا: "الفترة الجاية إن شاء الله هتنزل أغنيات تباعا كل أسبوعين، ودلوقتي بستعد لحفلات الصيف.. عندي حفلة في مكتبة الإسكندرية في أغسطس".
اقرأ أيضا:مدحت صالح يطعم قطته سعاد «بطيخ» بالشوكة
