بقلم : حسام العقدة
مش ممكن كان ييجى فى بالى..
إننا ممكن نتكلم فى الكورة مع بعض
وإن صلاح أحسن لاعب فى العالم
وابعت لِك لقطات اجوانه!
وانى أفضل طول الوقت..
أتابع ماتشاته
ولا يمكن كان ييجى فى بالى..
إننا نتكلم فى الموضة
أو انّى احكى لك عن علاقاتى النسائيّة
أو اننا نتكلم عن آخر أفلام أحمد حلمى
أو نتكلم عن أدوية الضغط
ودقات القلب الزايدة
واننا نتكلم طول الوقت فى مشاكلنا
وغياب الأطفال عن مدارسهم
أو نتكلم عن تغيير الطقس
وزيادة أسعار النفط، وأزمات الطاقة
ولا كنت اتخيّل وانا ويّاكى..
إن عينيا تبحلق فى السقف
وانّى افضّل أعمل فنجان القهوه لنفسى
وأفضّل أبقى وحيد
وان الأرض تدور من غيرك عادى
وانّى ماليش رغبة أناقش حد
ولا عاوز أرد!
وانّى افقد رغبتى فى كلامنا
وإنّك ما تجيش على بالى..
غير بالصدفة
وانّى اقدر أسمع صوتك كل دقيقة..
وما اكلمكيش..
وانّى اقدر أبعت لِك كلمة على الواتساب
وما ابعتهاش..
وانّى اقدر أكتب لِك غنوة
وما اكتبهاش!
وإن ما فيش حاجة مهمّة
وإن انا مش عاوز حاجة من الدنيا
وانّى افقد رغبتى فى كلام الحب معاكى
وانّى اضحك فجأة..
من غير أسباب!.
اقرأ أيضا | مذكرات الحزن
