نشرت الفنانة ياسمين غيث صورة لها على حسابها الرسمي بموقع تبادل الصور والفيديوهات الشهير إنستجرام، تحتفل من خلالها بمناسبتين مرتا عليها وتعتز بهما.
الأولى كانت مرور خمسة أعوام على شفائها من مرض السرطان بشكل نهائي وآخر جرعة كيماوي أخذتها، والثانية اليوم العالمي للمرأة.
وعلقت ياسمين غيث على الصورة بقولها: "قولت أعمل إحتفالين في واحد... يوم ٢٢.٢.٢٠٢٢ من أهم تواريخ حياتي، علشان من ٥ سنين كان ده آخر يوم آخد فيه كيماوي وتبدأ حياتي تتغير للأبد... وعلشان حياتي إتغيرت و إتعلمت كتير، قررت أحاول أغير حياة غيري و أكون مؤثرة بطريقتي و بالحاجات اللي اتعلمتها في الرحلة".
وتابعت "فبمناسبة كمان اليوم العالمي للمرأة قلت مافيش فرصة أحسن من ديه أعبر فيها عن نفسي وعن ستات كتير غيري... في ٥ سنين عرفت حاجات عن نفسي ماكنتش أعرف إنها موجودة من ضمنها إني قوية قوي وضعيفة قوي في نفس الوقت... وطبيعي نكون الإتنين.. إحنا بشر".
وأكملت في الـ٥ سنين عملت حاجات المجتمع كان بيفهمنا إننا كستات ما ينفعش نعملها (منها إني لما شعري وقع و قررت أخرج من غير شعر عادي)... حسيت إني عايزة أبقي براحتي وأعمل اللي أنا عايزاه من غير مافكر في المجتمع ولا في الناس هتقول إيه... فلخصتلكم كل الأحاسيس دي في الكلام اللي في الصور، الست مش محتاجة مسمي معين لاللي هي عايزة تعمله في حياتها، فمن الآخر كدة يا جماعة الست براحتها".
وأضافت: "وبمناسبة الـ٥ سنين اللي فاتوا دول برده والسؤال الكليشيه اللي بنتسأله كتير "شايفة نفسك فين ٥ سنين من دلوقتي" سألته أنا لنفسي من ٥ سنين وحضرتلكم حاجة كان نفسي أعملها من زمان وبقالي سنتين بجهز لها و جه وقتها... هقول لكم عليها في البوست الجاي".
