أحمد مصطفى شعبان
حسب تقديرات مجلة فوربس الأمريكية، يأتى الملياردير نجيب ساويرس فى المرتبة الثانية ضمن قائمة أثرياء مصر.
ده راجل جامد بقى؟..
اه رجل أعمال مشهور وناجح بس يا خسارة الحلو ميكملش.. ليه كده؟..
عشان بيحب التفاهة وزى ما بنقول بالبلدى «جاى فى الهايفة ويتصدر».
افتعل الرجل، الذى كنت أظن أنه ليس لديه وقت للتفاهة، أزمة لا تعنيه عندما تدخل فى شئون واختصاصات نقيب «المغنين» قصدى نقيب المهن الموسيقية، هانى شاكر، بإصدار قرار يمنع بعض مؤدى المهرجانات من الغناء.
فبدلا من أن يهتم ساويرس بمتابعة استثماراته فى الذهب والاتصالات، قرر أنه يركب الترند ويسيب كل «الهلومة» دى ويعارض قرار مطرب عاصر أم كلثوم وحليم. تخيل إن صوت هانى شاكر مش عاجب الملياردير! لا يا عم صوت بيكا أحلى فعلا. «دى آراء... آراء».
كمان لما هانى شاكر رد عليه، مش يسكت بقى ويلم الدور حتى بعد ما الناس هاجمته، لا ده قرر يستمر فى الترند وقال إنه هيجيب بتوع المهرجانات دول فى مهرجان الجونة. هيا القاعة الرئيسية ولعت من شوية!.
طيب يا أستاذ نجيب بدل ما تدفع ملايين عشان تجيب ناس أفسدت بأغانيها الذوق العام، ما تأسس حضرتك فرقة موسيقية محترمة كده من أطفال أو شباب وتورينا فنك اللى ممكن يعيش مع الناس ولا صعبة؟!.
طيب بلاش تكلف بس بلاش تساهم فى نشر أعمال خربت عقول وفكر مجتمعنا خاصة أنه للأسف الناس بقت تتباهى إنه حافظة الإسفاف ده وبقت المهرجانات المعيبة طريقة للفت الانتباه.
يا نجيب بيه ليه «تحط نفسك فى مواقف بااايخة» وتبقى مادة للسخرية بعد ما كانت الناس فاكرة أنك من الشخصيات الراقية وفى شباب أعرفهم كنت قدوة بالنسبة ليهم بس للأسف خذلتهم. لا بس هانى شاكر طلع أمير الغناء فعلا.
إقرأ أيضاً|فرفش كده | على مقهى سيدهم فرويد ٢
