صح صح
من أهم تجارب حياتي الثورية اللي اتعلمت منها كثير زيارتي للسوبر ماركت استعدادا لشهر رمضان.. وبدأت الحكاية من ساعة ما حطيت رجلي اليمين في المكان لقيت ست بتسألني ممعاكيش شنطة احسن السلات خلصت وهدومي مش مكفيه ياريتني جبت العباية بتاعة الحج اللي كلها جيوب.. قلت لها ثواني كدا بايني نسيت رجلي الشمال بره ومش عارفة ادخلها.. ببص حواليا لقيت مليونية رجعتني لأيام التحرير ابتسمت وقلت هوه دا بالضبط اللي انا محتاجاه روح الثورة.. حبة اصرار علي شوية صمود يمكن ارحل بسلام.