مايسة أحمد
من الحاجات اللى شاغلة بالى من فترة كبيرة وطبعا ده لأنها جزء من حياتى اليومية هو الشغل.. إحنا ليه معندناش مراعاة لظروف الأم العاملة؟ أو بمعنى أدق ليه مفيش إستثناءات منصوص عليها فى القانون تسمح للمرأة إنها تشتغل وتراعى بيتها وأولادها فى نفس الوقت.. خلينى أترجم الموضوع بالتفصيل عشان يكون قصدى واضح..
وقت ذروة الكورونا كان فى قرار حكيم برقم 719 لسنة 2020 بينص على “ أى امرأة عاملة عندها أولاد أقل من 12 سنة تمنح لها إجازة إستثنائية مدفوعة الأجر ولا تحسب ضمن الإجازات المقررة قانونا ولا تؤثر على أى من مستحقاتها المالية”..
طبعا أنا مش قصدى إننا ندى إجازة مفتوحة بقى ونوقف الشغل ونأثر على عجلة الإنتاج.. أبدا..
بس ليه مانخدش الشق الأول أننا نعفى الأمهات العاملات من الحضور الإلزامى لمقر العمل طالما أن متطلبات وظيفتها تتيح لها تأدية عملها كاملا عن بعد وفى نفس الوقت تاخد مرتبها اللى بيساعدها أكيد فى ظل متطلبات الحياة الصعبة اللى أكيد كلنا بنمر بيها؟ وطبعا كل رئيس عمل من حقه أن يدير منظومته بما يناسب متطلبات العمل.. بمعنى إن وجد تقصير من الموظفة يلفت نظرها وإن إستمر تقصيرها يوجه بعودتها للحضور اليومى وطبعا لازم يكون ده بضوابط محددة عشان مايديش فرصة للتعسف مع الموظفات بدون مبرر..
لا أنكر أن هناك بعض رؤساء العمل اللي بيدوا إستثناءات إنسانية للموظفات ولكن الموضوع محتاج أنه يكون بشكل قانونى يعمم.. لأن المرأة العاملة اللى عندها أطفال بتكون مشتتة طول الوقت بينهم وبين شغلها.
أنا عارفة طبعا أن فى نص بقانون العمل بيشير لتخفيض عدد ساعات العمل بمقابل خصم جزء من المرتب لكن أنا هنا بتكلم عن حل مختلف لأن مع الأسف حل تخفيض ساعات العمل لا يطبق إلا فى بعض المصالح الحكومية فقط..
إقتراحى على فكرة له مزايا كتيرة على الدولة كمان أنك بتقلل عدد الموظفين المتواجدين فى مقر العمل وبالتالى بتقلل من إستخدامهم للكهرباء أو المكاتب أو المرافق.. إلخ كمان بتقلل عدد الناس المتكدسة فى الشوارع.. بتدى فرصة أن الأم تركز فى شغلها وهى مطمنة على ولادها وكمان تقدر تربيهم وتراعيهم أكتر.
إذا كانت تجربة العمل من البيت دى نجحت لما إطبقت على الجميع رجال وسيدات وقت ذروة الكورونا والحظر الشامل يبقى الأكيد إنها حاتنجح لما تطبق على الفئة المقهورة يوميا بين شغلها وتربية أبناءها ومهامها المنزلية التى لا تفنى وتستحدث من العدم..
الفكرة فعلا تستحق الدراسة والمناقشة..
فكروا فيها بس..