روت الفنانة مديحة يسرى فى حديث إذاعى كيف تزوجت من المطرب أبو دم خفيف محمد فوزى عندما سألتها المذيعة قائلة: «المستمع متشوق يعرف قصة حب وزواج مديحة يسرى ومحمد فوزى، ويقال إن المنتج حلمى رفلة أوقف تصوير فيلم بطولة محمد فوزى وصباح، لأن فوزى كان يعيش قصة حب عنيفة جدا ومش عارف يلحن استعراض باقى فى الفيلم.. فهل الكلام ده صحيح ؟
ردت مديحة قائلة: «فعلا الصديق حلمى رفلة جالى وقالى: «فى عرض دينك، اعملى معروف عايزين نكمل الفيلم»، قلت له «فيلم إيه ؟!».. قال لى فيلم لصباح ومحمد فوزى، قلت له «طب وانا دخلى إيه ؟!».
قال لى: «يا ستى محمد فوزى بيحبك، وخايف يعترفلك ترفضيه وتلغى الصداقة اللى بينكم وتكرهيه، ولذلك مش عارف يلحن بقية أغانى الفيلم فوقفنا التصوير، ناقص استعراض مكملوش لأنه أعصابه تعبانة جدا، فهو عايز بس وعد سواء بعد شهر أو سنة أو سنتين أنك مترتبطيش بحد غيره».
وتستكمل الفنانة مديحة يسرى قائلة: «قلت له والله يا حلمى.. فوزى صديق عزيز، إنما سيبولى فرصة عشان أغير إحساس الصداقة إلى إحساس أنه يبقى زوج، سيبولى المسألة دى شوية».
وجالى محمد فوزى وقال لى: «طب بس نلبس الدبل».
وتستكمل: «ولبسنا الدبل حوالى سنة وهو كمل فيلمه مع صباح وبعده عملنا فيلم «نهاية قصة»، وبعدين تزوجنا ورحنا قضينا شهر العسل فى باريس وقعد يدلعنى ويشتريلى كل اللى نفسى فيه واللى مش نفسى فيه، واحنا ماشيين فى الشانزلزيه قال لى «أظن بقى مفيش حاجة معملتهاش وانتى مش نفسك فى حاجة»، قلت له «لأ نفسى فى حاجة»..
قال لى «هى ايه ؟!»، قلت له «نفسى اسمع قرآن»..
قال لى «يا سلام بس كده».. ودخلنا أول كافيه قابلنا راح قالع الجزمة وقعد متربع على كرسى وقعد يقرأ قرآن..
وبعد ما خلص قال لى «ها نفسك فى حاجة تانية معملتهاش ؟».
قلت له «لأ خلاص انت كده عملت لى كل اللى انا عايزاه».
من «حديث إذاعى»
