الصبارة نفد صبرها من غلبها دموعها دايما على خدها حاطنها ع المقابر تقابر وتسمع عويل ونحيب قالت يا بختى الأسود مش معنى الرياحنة أختها.. فرحانة مظأططة فى أوانى الزرع مسقية فى الشرفات محمية الكل ييجى يشمها مش الصبارة الكل بيخاف يقرب منها دا شؤم يا ناس سيبوها محدش ييجى جنبها سيبها كده لوحدها فى الحر القيظ والبرد القارس تآسى غلبها.
الصبارة بتشوف وتنعى حظها والكل هايص على مرأى بيرقص وسيبينها ليه تقاسى لوحدها.. قالت الصبارة لنفسها لما لقت الدنيا مقلوبة حولها وهى من زمان بتندب ولا حد واخد باله منها ولا مقدر حزنها وغلبها.
يابت يا صبارة اتحركى الكل بيتحرك وإنتى ساكنة فوق المقابر تلطمي.. التك توك أهه بالرقص مليان زغزغة وكل الناس بتلهث وراه عشان تاخد حظها آل ايه تنزل التطبيق يجيلك 900 جنيه والكل شغال بيزنس يبعت دعاوى يخطب ودها.. وأهو كله رقص يبت اعملى زيها.
ياعيب الشوم وعيب ليه «عمر كامل» زيها عمال يقول مهرجانات وفلوس ياما بيلمها مش بس كده عمال يتكلم فى الفاضى والمليان آل ايه بقى قدوة مش فى الرقص وتخريب الذوق العام كمان فى التعليم «مش مهم تجيب نسبة نجاح كبيرة فى الثانوية المهم تعرف تعمل فلوس».. يا دى الكسوف عامل علينا قدوة ونازل على النقطة يلمها ويحرض شبابنا ضد التعليم أكمنه اتحرم يا عينى منها.
الصبارة قالت لنفسها يابت بلا هم ولا غم ودراسة وتعب مش جايبه همها.. سيبك من ترب الخفير والإمام وهاجرى شمى نفسك واجرى بعيد عنها.. هتروحى على فين على الساحل بيقولى رقص وبغددة وناس بتشرب وناس بترقص وناس بتسرق قبلة سريعة للملحوف اللى على ورد الخد يطوف.. الكل هايص ولا حد شايل همها.. حفلة حكيم حفلة رمضان وأى حفلة مش مهم ناخد نصيبنا منها.
رجعت الصبارة وقالت لنفسها إنتى بشكلك الحزين ده هيقبلوكى عندها لا طبعا فستان سواريه أو بدلة رقص استلفيها حتى من أختك فلة واعملى زيها شوية هز ورقص تجيبى كتير وأكتر من التك توك ومن فلة وقرنفلة وبنات عمها.. لبست الصبارة واتغندرت بقت عروسة الله أكبر نورت اتحزمت لكن يا حسرة فكرت رقص إيه الكل بيرقص والمنافسين ياما هتروحى فين يا حزينة وسط الوشوش اللئيمة.. الزعيم عادل إمام بيقول «رقاصة وبترقص» عادى هاتى الجديد يا منيلة وتبقى ضربة حلوة بالفلوس مشخللة.
خايفه ليه أهى لعبة طابت يا خابت هتروق وتحلى والليلة ليلتك يا أبو العلا.. أرقص وأردد الكلام والخبر ينتشر بين الجيران والعيال تعيط وتشتريها ونكسب فلوس متلتلة.. متخديش فى بالك هيحذروا منك ويقولوا بتخرب عقول العيال مهى الألعاب الخطرة على العيال وأدمغتهم راكبة ورجليها مدلدلة.. الصبارة رقصت واتكلمت والناس وراها على مواقع التواصل عملنها حفلة طالبين القرب صغار وكبار عايزينها ترقص وتردد كلامهم.. هنقول إيه حكمة ربنا.
أساتذة علم النفس مسبوش الصبارة فى حالها وعيونهم طمعانة فى مالها.. قالت الصبارة لأختها يا ختى الحقينى هيدمرونى قال إيه بسبب مشاكل للأطفال عشان جذابة بالذمة بقى ده اسمه كلام دنا حتى ثمنى 400 جنيه بس ودى حاجة بقت قليلة.
يا بختك لسود يا صبارة ويا وقعتك المأندلة الأساتذة بيقولوا: تنمية لغة الطفل بالتعامل مع أشخاص حقيقين والتفاعل بالوجه وتعبيرات الجسد، هو فى أحسن من اللى بعمله تعبير عن لغة الجسد ما يشوفى مهرجانات الساحل ولا عمر كمال وبيكا وشاكوش وهنروح بعيد ليه الحوت الأزرق وبابجى وغيرهم كتير.. ميحكومش ولا جات الحزينة تفرح ملقتش مطرح.
