اعتادت السفر والترحال منذ صغرها، حتى تكون خيالها من المناظر الخلابة فى الدول التى وطأتها قدميها.
إيمى عبدالغني، سفيرة الجمال المصرية، التى خاضت العديد من الرحلات السياحية حول العالم، أبرزها فى قبرص وتركيا والإمارات.
تحكى إيمى للأخبار:"فكرت السفر جاتلى وأنا صغيرة، بحب المغامرات وبحب جداً أشوف الطيارات..عشت أغلب عمرى فى تركيا مع الأهل، وفى أول رحلة ركبت فيها الطيارة لوحدى كانت لقبرص كنت فى أسعد لحظاتى جوه الطيارة وطلبت من موظف الحجز أنى أقعد جمب الشباك عشان أشوف العالم من فوق زى ما كنت بحلم، وفاكرة من كتر حبى للحظة دى مكنتش عايزة عينى ترمش عشان مفيش أى منظر يفوتنى».
وتابعت إيمى :"عملت فى قبرص صحاب كتير وشوفت المعالم الجميلة زى بافوس عاصمة قبرص الثقافية، ودى شوفت فيها مقابر الملوك الفخمة اللى اتبنت من أربعة قرون قبل الميلاد لأغنياء المدينة وحدائق أثرية فى كاتو بافوس اللى تعتبر من أحسن المزارات فى قبرص، وكمان زرت صخرة أفروديت اللى موجودة فى قلب البحر المتوسط واللى ولد عليها آله الحب والجمال أفروديت..
وزرت ايضا مدينة لارنكا حبيت فيها شاطئ فينيكودس وهو واحدٌ من أجمل الشواطى هناك ومعروف برملته البيضاء الناعمة وأمواجه الهادية وزرت بحيرة لارنكا المالحة عبارة عن أربع بحيرات بتتملى ف الشتاء بالمطر وفى الصيف المياه بتجف، شوفت كمان مناظر جميلة جدا ودى كانت أول رحلة ليا لوحدى وعمرى ما أنساها».
وأضافت إيمى أنها سافرت أيضًا إلى السعودية، واكتشفت أنها تحتوى على العديد من الوجهات السياحية، مثل منطقة شرم أبحر التى توجد على بعد 30 كيلو متراً من جده ، كما زارت لبنان وانبهرت بالمناظر الطبيعية التى لا يصدقها عقل، وزارت مدينة بعلبك لتكتشف الآثار الجميلة المتواجدة بها، وكفر دبيان.. وأضافت إيمى :»وبعدها استقررت فى مصر بلدى الحبيبة الجميلة اللى فيها كل الأماكن اللى مش فى البلاد الأخرى بصراحة مهما شوفت أو هشوف فى بلاد جميلة هتفضل مصر أم الدنيا فيها الجمال والجو المعتدل.
