فى تلك الليالى الحارة، والرطوبة تحيطك من كل جانب، حتى إن جهاز المكيف خاصتى قد اشتكى رغم أن عمره لم يتجاوز العامين، وأعلن تمرده بكل صراحة «مش شغال أنا فى الجو ده»، وللحقيقة أشفقت عليه من لسعة الشمس الحارقة وارتفاع الرطوبة الخانق، لأغلقه ليرتاح قليلاً، وإذا بصوت عالٍ قد أتى من مطبخ شقتنا المتواضع «يا بييييه..
بنادى عليك بقالى ساعة».. زوجتى العزيزة تستمتع بنار جهاز الموقد الحارق، لتعد لنا بعضاً من «الطبيخ البيتي» الذى طلبته لتوى، دائماً تسعى لإرضائى، «نعم يا حبيبتي» .. تعالى يا أستاذ شوفلك حل، الجو حر وأنا مش طايقة وقفة المطبخ فى الحر ده .. لأرد مسرعاً .. طيب يا حبيبتى تعالى بلاش أكل .. احنا نطلب دليفيرى أحسن بدل وقفتك فى النار دى.
يلا اطلب لنا بيتزا خضار للعيال وأنا عايزة مشكل جبن كبيرة سبايسى وانت هاتلك بيبرونى ..
لأرد : بس أنا مش بحب البيبرونى .. فتقاطعنى .. ماهو انت مش هتاكلها لوحدك، انا بحبها وعايزة أكلها معاك .. ولا انت خلاص مبقتش عايزنى أشاركك حاجة!
لأجد نفسى مرغماً طالباً البيتزا المرجوة وباقى الطلبات.. فهى شهية للحقيقة جداً، وأدفع الفاتورة التى تتعدى الـ 4 ورقات فئة الـ 100 جنيه بقليل، وبعد «الأكلة المرجوة» تأتى ابنتى الصغيرة ذات الـ 5 أعوام وتقول.. بابا فيه أغنية جديدة لأحمد أمين سمعتها.. قولتلها مين أحمد أمين ..
فى محاولة منى للمراوغة، فأنا أعلم ماذا ترنو إليه، قالت: أحمد أمين اللى بتحبه اللى بيضحكك على تصرفات ماما وتيتا دايما ده.. بيقولك أنا عايز أصيف.. وهنا تتحدث زوجتى بكل ثقة وكأن الطلب تم تنفيذه بالفعل .. بس اعمل حسابك ..
ده مش بديل عن فندق الغردقة أو شرم اللى وعدتنى بيه فى عيد ميلادى وعيد جوازنا ولا نسيت..
«بلعت ريقى بالعافية» لأرد بصوت مبحوح، بس الساحل ده مش عارف اخد إجازة وضهرى والغضروف انتى عارفة..
لترد قائلة: متنزلش الميه بسيطة.
7 ساعات قضيتها باحثاً على موقع لتأجير شاليهات أو شقق فى قرى الساحل الشمالى ..
لأجد أقل مكان فى الساحل القديم «بتاع الغلابة» يبدأ من 1000 جنيه لليلة الواحدة وأقل مدة حجز أسبوع لأجد بحسبة بسيطة 7000 جنيه وأجد عروضاً على شهر سبتمبر الليلة تصل إلى 800 جنيه أى أن الأسبوع يصل إلى 5600 جنيه .. طيب أجيب منين ..
لأجد زوجتى المصون تلقى بالكارت الأخير «لتقفل لعبة الدومينو» بقولك إيه الجمعية اللى عملينها عشان مدرسة البت، تعالى نستلف على حسها، ونطلع يومين وبعدين ربنا يحلها، هيكون ربنا فرجها ..
والأكل محلولة بانيه ومكرونة ولحمة مفرومة ومكرونة وفراخ مشوية ومكرونة وباقى الاسبوع تغدينا بره ..
وأهو يا سيدى نرحم التكييف اللى شغال 24 ساعة وباظ من كتر الحر، وترحم نفسك من فاتورة الكهرباء اللى لسه مش عارفين هتعمل فينا ايه..
طيب حلو نستلف عشان المصيف ونعمل جمعية جديدة عشان فاتورة الكهرباء .. يلا بينا ....
