تحدثت الفنانة ريهام حجاج، عن زواجها من رجل الأعمال الشهير محمد حلاوة، وذلك بعد انفصاله بعام واحد عن زوجته الفنانة ياسمين عبد العزيز، مما أثار جدلًا واسعًا حينها خاصة أن ذلك الانفصال لم يكن معلنًا.
وتابعت “حجاج” خلال لقائها مع الإعلامية بوسي شلبي على شاشة “النهار”: “ يمكن الجدل عشان محمد ارتبط بشخصيتين مشهورتين.. محمد شخص ناجح ومعروف، أنا وهو اتجوزنا بعد سنة من طلاقه، والطلاق ده مكنش معلن، والطرف التاني الآخر طلع قال تفاصيل الزواج في برامج أخرى.. كل واحد حر حتى لو الطرف التاني ما أعلنش طلاقه، ودي حياة شخصية مش معنى أن اتنين اطلقوا يبقى حد فيهم وحش أو كان في مشكلة”.
واستكملت: “ممكن جدًا الاتنين ينفصلوا لأسباب خاصة بينهم، الناس مش المفروض تحكم أو تتكلم في حاجة شخصية زي دي، إحنا بنعاني من ده عشان إحنا مشاهير”.
وتابعت: “الجمهور المحترم مابيتدخلش في الحياة الخاصة للفنانين الناس اللي بتنتقد وبتكتب على السوشيال ميديا ده مش الجمهور، بقى عندنا اختلاط في الجمهور بين رأيي والتطفل لما حد بيبدي برأيه في حاجة لا تعنيه، الحقيقة مافيش أي حرب وكل الأطراف اتجوزت ومحدش شايف الحرب دي غير جمهور السوشيال ميديا، محبتش أطلع أرد وقتها لأن هي مش حاجة غلط أو حاجة مخلة بالآداب”.
واختتمت الفنانة ريهام حجاج حديثها بأنها دائمًا تتجاهل الانتقادات التي توجه على مواقع التواصل الاجتماعي، مشيرة إلى أنها تظهر فقط للتحدث عن نجاحاتها وأعمالها: “مبعرفش أطلع في برنامج مخصوص أقول تفاصيل حياتي الشخصية بتكلم عن أعمالي فقط”.
