همسة هشام
مشهد بسيط من فيلم «سلامه فى خير»جمع بين صديقى العمر نجيب الريحانى وشرفنطح « إذا لم تكن لى والزمان شرم برم فلا خير فيك والزمان ترللي»
الحكاية وما فيها أنه احنا عايشين نقابل ناس ونفارق ناس، فيه منهم اللى مكمل معانا وفيه منهم اللى بيكمل علينا.
ولكن فى حقيقة الأمر أنها دروس الحياة «قرصة ودن» جايز تكون صعبة شوية أو شويتين.. معاك حق لكن المعادلة كالتالي
فلان ١ +فلان ٢+عِشرة+عيش وملح وكباب= قليل الأصل مصلحجى يعني
فلان ١+فلان ٢+ عِشرة+ عيش وملح وكباب= صاحب صاحبه
كان كل المقصود من معادلة الحياة أنك يا فلان نتقابل كذا فلان هيشوفوا معاك الوحش والمر « عيش وملح» ويعيشوا معاك الفرح والسعد « الكباب» ومعاهم طحينة وسلطة
واشمعنا الكباب.. هقولك احنا شعب العز والغنا يعنى كباب وكوفتة.
وعالرأى المثل «تعرف فلان آه... عاشرته لا.. يبقى متعرفوش»
الصداقة والعشرة الطيبة بتتقاس بالأيام والسنين وتجربوا بعض جملة سيد « والعمر فيه كام سنة عاشان ألاقى صاحب زيك»
هتلاقى صاحب زى سيد وعاطف، حياتنا فيها الحلو والوحش، ولازم تجرب وتدوق من كل لون يا بطيسطا» زى ما بنقول»
العشرة والأيام والصُحبة كفيلة أنها تعرفك معادن الناس وحقيقتهم، متفرحش بالضحكة واللى تجرى عليكى يوم فرحك واللى يعزمك عاشان اترقيت فى شغلك....استنى انت وهى «واقعوا.. واحتاجوا... واستغيثوا»
وابقى قابلنى بأه وسلام يا صاحبى «بخ» كلهم
عاشر يابن آدم كيف ما تعاشر مسيرك تفارق.
وسنة الحياة لقاء وفراق وبينهم سيرة.. حافظ على سيرتك ده اللى باقى منك
فيه ناس بتتعامل بمبدأ الدين « الحمدلله أنا شخص الناس بتبلجأ ليا اساعدهم واخرجهم من الكرب.. وناس بمبدأ البشر العاديين ده بتاع مصلحته»
إن كنت مع دول أو مع دول عالرأى الزعيم، اوعى تنسى تسمع كلام مامتك أما تقولك مش مرتاحة لفلان عاشان غالبًا هى صح.. وكله فى الآخر قرصة ودن وتعدي، المهم نتعلم..
ودمتم سالمين
