بقلم.. الشاعر/عصام حسني
تحت مسمّى بنشترى راجل
شقة وشبكة وعفش ومهر
ونطلع فاصل
والأجهزة على مين ومنين
وبدأنا نفاصل
ب جشع مش عند الشياطين
قايمة مع مقدّم ومؤخّر
تعقيد بعد ما ربنا يسّر
كلنا فى الأرقام بنكسّر
بس أخيراً متفقين
بعد عراك ومخالفات فادحة
قولنا آمين وقرينا الفاتحة
خلصنا وتممنا الصفقة
قاعة كبيرة سعة ألف منافق ومنافقة
وضع غريب ومثير للشفقة
طب نضغط مصاريفنا شوية
فيه حاجات أولى
عملت محاولة
بس خلاص بتكلم مين
خلصنا الجولة
قومت وكلمت المأذون
رحّب ووصفلى العنوان وطلب عربون
قولتله هو أنا مش مضمون!
قاللى العفو يا ابنى إنت حبيبى
هوّه أنا عندى كام مجنون
