احم احم !

أمينة وسى السيد و»الفاكسين» !

هشام مبارك
هشام مبارك

- مالك يا أمينة أديلك جمعتين أهو راقدة فى السرير حكايتك إيه؟
- ربنا يستر ياسى السيد والله خايفة ليكون الوبا اللى ماشى اليومين دول.. أمانة عليك ياسى السيد لو جرالى حاجة تاخد بالك من العيال وماتجيبلهومش مرات أب!
- هو ده كل اللى يهمك ياولية؟..عموما اطمنى عمر الشقى بقى إنتى كويسة وزى الجن وكل الحكاية دور برد شديد..ده حتى لو لاسمح الله كورونا كان زمانك خفيتى!
- والله مانا عارفة ياسى السيد..الحمدلله على كل حال..ألا صحيح قولى ياسى السيد..هو يعنى إيه لوئاح ياخويا ؟
- ههههههههه الله يحظك يا أمينة اسمه لقاح ياولية بالقاف مش بالهمزة.
- مش مهم الشكليات دى ياسى السيد المهم يعنى بيعملوا بيه إيه؟
- اللقاح ده يا أمينة عبارة عن فاكسين..عارفة يعنى إيه فاكسن؟
- هو فيه واحدة ماتعرفش فاكسين خليل الممثل الحليوة ده؟
- الله الله وكمان بتعاكسى الرجالة يا أمينة وعارفة مكسيم خليل وحافظة شكله؟
- مش قصدى والله ياسى السيد هو أنا فيه راجل يملا عينى غيرك؟أنا بس قصدى انت بترطن بالإنجليزى وباقولك يعنى إيه لوئاح تقولى يعنى فاكسيم ولا أبصر إيه..هو أنا يعنى عرفت الأولانية ياسى السيد لما حاعرف التانية؟
- معلش سامحينى نسيت إنك متعرفيش إنجليزى.
- لا اسم الله عليك خريج مدرسة فاكفروفود!
- أولا دى جامعة مش مدرسة واسمها اكسفورد ياجاهلة..ثانيا ماتطوليش لسانك واتلمى ياولية انتى عيانة ومش حمل قلمين.
- أحب على يدك ياسى السيد ماتزعلش باهزر معاك.
- حافوتهالك المرة دى عشان عيانة بس..بصى ياستى الفاكسين يعنى لقاح يعنى مصل يعنى دوا يعنى علاج للى ماتتسماش الكورونا.
- أيوة أيوة قولتلى أصل ياخويا عمالة كل شوية أسمع فى التليفزيون أبصر دولة مين عملت لوئاح وأبصر دولة مين تانية لئحت عليها بلوئاح تانى اشى صينى واشى أمريكانى واشى روسي.
- أيوة فعلا كل الدول داخلة سبق علشان تعمل لقاح.. مانتى شايفة أهو الكورونا مبهدلة العالم كله ازاى والصين نزلت أول لقاح وكمان أمريكا وروسيا وبريطانيا
- يعنى خلاص العالم كله حايبقى صينيين مثلا ولا أمريكان لو أخدنا الدوا بتاع أمريكا؟؟
- انتى بتقولى فيها؟ ياريت الغرب ولا حتى الصين يا أمينة تخترعلنا لقاح ضد التنبلة والكسل اللى احنا فيه يمكن نتعدى منهم ونبقى زيهم عاملين زى المكن اللى مابتتعبش من كتر الشغل.
- لا أنا مش قصدى أنا بس خايفة نلاقى نفسنا بقينا قصيرين وعينينا تبقى ضيقة زى الصينيين ولا طوال وشعرنا أصفر زى الأجانب اللى بره؟
- وماله وهو انتى تطولى تبقى زى الأجانب ياولية شوفى صحتهم عاملة ازاى لكن شوفى انتى أديكى مثلا شوية برد خلوكى نايمة أسبوعين فى السرير وسايبانى متبهدل لا عارف أغسل هدومى ولا أكوى ولا حتى آكل ومقضيها ديلفرى ساندويتشات لما معدتى خلاص نشفت.
- ماهو انت شايف ياسى السيد غصب عنى وكل الدوا اللى باخده مش نافع.
- لا انتى بتدلعى بصراحة يا أمينة والوضع ده مش ممكن يستمر.
- خلاص ارقينى ياسى السيد واقرالى قرآن.
- حاضر بعد صلاة العشا أجيبلك معايا من سيدنا الحسين واحد فقى علشان يقرالك شوية قرآن.
- فقى مين ياراجل ماترقينى انت ياسى السيد.
- ماتحرجينيش يا أمينة أنا بصراحة مش حافظ كتير من القرآن.
- قول اللى حافظه ياسى السيد.
- مش حافظ غير وانكحوا ما طاب لكم من النساء مثنى وثلاث ورباع.
- خلاص خلاص صدق الله العظيم ياخويا أدينى قايمة حالا من السرير..تحب أطبخلك جوزين حمام ولا شوية كوارع ترم بيها عضمك؟