أكد الفنان صلاح عبد الله أنه يفضل لقب "الممثل" أفضل من لقب "النجم" كاشفاً أنه كان في البداية يحب كلمة "مشخصاتي" لخفه دمها قائلا " بحبها أوي لخفة دمها بس قدمت شوية ولما كنت بعمل مسرح كنت بحب كلمة " مضحكاتي " لأن الهدف الأساسي من المسرح إضحاك المتفرج ".
وأضاف صلاح عبد الله في حواره مع الاعلامية لميس الحديدي عبر برنامجها " كلمة أخيرة " المذاع على شاشة " ON" قائلاً : " بعد كده بقيت " ممثل " لاني بحس إن قيمتي كصلاح عبد الله أني ممثل وأنا دائماً ببقى ناسي إني ممثل لكن لما بيجي ناس تسلم عليا بيفكروني إني ممثل "
وواصل عبد الله " أما على السوشيال ميديا لما بلاقي ناس بتتفاعل معايا وبتفكرني بأدوار معينة وإفيهات قلتها .. دوول بقى بيحسسوني بنعمة ربنا عليا وبحس وقتها إني محبوب بجد ".
مشيراً إلى أن كونه محبوباً هي الأهم بالنسبة له معتبراً أنه لم يفكر يوماً في بدايته أن سيصبح صلاح عبد الله المحبوب مؤكداً أنه كان يحب التمثيل منذ أن وعى على الدنيا .
وتابع قائلاً " أنا بقيت زملكاوي بسبب أسرتي لان والدي وإخواتي وجميع أقاربي كانوا زملكاوية وبالتالي بقيت زملكاوي بالوراثة لكن بقيت ممثل ليه ؟ مش عارف لان مافيش حد في العيله بقى ممثل ووالدي كان موظف في وزارة الصحة وأمي كانت ربة منزل وظيفتها إدارة المنزل لانها من قامت بإدارة والدي ..".
وأكمل " ليه بقول إن أمي هي الي أدارت أبويا لانها أخدت قرارات مهمة فلما جينا ننقل من بولاق ابو العلا لبولاق الدكرور هيا من أخذت القرار وأخذت الارض وهي من قامت بالبناء كانت بتعمل كل حاجة لأن أبويا بطبيعة وظيفته كان بيقضي معظم وقته في الشغل لكنه كان راجل نشيط وكان بيصحى الصبح يعملنا الفطار لما أمي تعبت وهنا جاء دوره وشال أمي وشالنا وبعدين لما تعب أخويا الكبير شالنا كلنا ".
وأستطرد " عشان كده كنت بقول على السوشيال ميديا في أحد أشعاري الزجلية هيا حلاوة روحنا راحت ولا فاضل منها حبة ..أصل حلاوة روحنا كانت في التسامح والمحبة ".
متسائلا " فين بقى التسامح والمحبة دلوقتي وهل الي بيحصل دلوقتي على السوشيال ميديا يعكس التسامح والمحبة دي ؟.
صلاح عبد الله: أفضل كلمة ممثل .. وزمان كنت بحب لقب «مشخصاتي»
