صور| مغامرة مع الذئاب المفترسة في صان الحجر بالشرقية

ذئاب مفترسة تهاجم القرية في الليل و النهار و الضحايا بشر و مواشي 
سلامة: «لقيت ابني غرقان في دمه و 3 ديابة بيهاجموه» 
عبدالسلام: الجيران أنقذوني بالشوم من أنياب الذئب 
أحمد: «حاول يفترسني و أنا نايم و قطع شريان إيدي» 

 قام بالمغامرة : أحمد الدفاني 

حالة من الرعب و الفزع تنتشر بين أهالي قرية منشية السلام الجديدة التابعة لمركز ومدينة صان الحجر بـمحافظة الشرقية والتي يطلق عليها الآن "وادي الذئاب" بعد ظهور العديد من الذئاب المفترسة التي تهاجم القرية ليلاً و نهاراً.

انتقل محرر "بوابة أخبار اليوم" إلى مكان الحوادث المتكررة لنقل صورة حقيقية بالصوت والصورة من مكان الحدث واللقاء مع ضحايا الذئاب الفترسة الذين نجوا من هجمات مميتة.

في البداية يقول محمد سلامة فرج أحد سكان المنطقة: "ظهر في الفترة الحالية حيوان اكتشفنا أنه  ذئب مفترس يهاجمنا في الليل والنهار، مش أول مرة يظهر وعامل لينا رعب وبنخاف على أولادنا وعلى المواشي عندنا وقبل كده هجم علي ابن اختي وأبوه في قرية جنبنا هنا ولولا العنايه الإلهية كان مات، والطريق عندنا هنا صعب بليل مفيش اضاءه وصعب الخروج بره البيت بعد المغرب خوفاً من الديابة".

وقال حلمي فرج سلامة من سكان المنطقة: "أنا كنت بسقي الرز بالليل وكان معايا ابني وفجأة سمعت صوات وصراخ ابني طلعت أجري لقيت ابني غرقان في دمه قولت ده كلب مسعور  لاقيتوا ديب وهو نفس الديب اللي شوفتوا قبل كده ودا مش واحد دول ثلاثة واحنا مبنعرفش نودي ولادنا المدارس ولا في مدرس راضي يجلهم خوفاً من المنطقة بليل والله علي ما أقول شهيد، ومدرس العربي رفض يدي  درس لولادنا بسب المكان والديابة و قالي أنت عايز تموتني، والموضوع ده سمع في منطقة صان الحجر كلها وبرغم من كده مفيش مسئول تحرك ولا سمع لينا".

أما عبدالسلام إبراهيم خليل فأكد: "أنا شوفت الديابة ولما شوفتهم فضلت أصرخ بصوت عالي لما الجيران جت بشوم والكشافات لولاهم كنت بقيت عشوتهم وقبل كده واكل فخد جاموسة وأكل ابنها الصغير مخلاش منه حاجة غير العضم في قرية أبوشلبي جنبنا".

وأضاف محمد سالم أحد شباب القرية قائلاً: "أثناء الحفر لمحطة مياه الشرب بصان الحجر لاقوا ديب ميت هما كانوا 4 وهرب التلاتة الباقين على القرى والنجوع المجاورة وهما عايشين في مزارع الثروة السمكية التابعة لمركز ومدينة صان الحجر".. فيما قال أحد الأطفال: "الديب هاجم أخويا وكان هيموت".

ومن نساء القرية تقول نوال محمد عامر: "احنا والله في غابة بنخاف نخرج من البيوت ولو عيل من العيال سمع صوت بره في الشارع يصرخ ويقول الديابه جت وهو جوه البيت".

اقرأ أيضًا| مليار و840 مليون جنيه قروضا من «مشروعك» لشباب الشرقية

وقام محرر "بوابة أخبار اليوم" بزيارة المنطقة ليلا لنقل صورة حية من أرض الواقع والتقى مع المواطن أحمد محمد علي عبداللطيف، وهو من تعرض لإصابات بالغة في اليد والرأس والظهر، حيث قال: "أنا بنام في الأرض منذ الصغر و متعود و ليلة الحادث كنت نايم نعسان ووالدي جنبي صاحي بس كان ملفوف في ملاية  بس مكنش باين صحيت وأنا بصرخ ووالدي بيقولي في أيه في إيه قولت الحقني الحقني وانا غرقان في دمي والدم نازل من كل مكان من رأسي ..انا لما صرخت الديب اللي كان بيحاول يهاجمني من رقبتي  رجع لورا بكام متر ولما عرف كمان أن في حد تاني، احنا فكرنا كلب لكن لما خبطني بظافر رجله فتح راسي جرح 15سم وقطع شريان أيدي نورنا الكشاف لاقيناه ديب واقف بدأت انشف في دمي ومسكت الكوريك ووالدي كان معاه شومة هجمنا عليه كان بيهاجم فينا بشراسة كبيرة وخد ضرب كتير و مامتش، والدي بدأ يصرخ بصوت عالي للاستغاثة و فعلا  الجيران طلعت و لحقونا.

 
فجأة وقعت محستش بنفسي أغمي عليا ولقيت نفسي في الإسعاف جه شالني من قلب الأرض وروحت مستشفى الحسينية المركزي، وعلشان كانت الإصابات كبيرة تم تحويلي إلى مستشفى الزقازيق العام وكل ده مثبت في  محاضر مستشفى الحميات العام بالزقازيق وفضلت متابع طبيا حتى  حتي نهاية آخر مصل من 10أيام فقط".

اقرأ أيضا| فحص 236 ألف تلميذ بالمبادرة الرئاسية لعلاج سوء التغذية في الشرقية

وتابع: "أثناء دخولي المستشفى جالي أمين شرطة تبع نقطة مستشفى الحسينية المركزي ولما سألني عن سبب الإصابات الدامية و المروعة  قولت اللي حصل وقولت عايز أعمل محضر بالواقعة قالي بالنص،  لو روحت تعمل محضر هيضحكوا عليك ومين هيصدق كلامك ولما الكل قال لازم تعمل محضر بالواقعة خوفت بعد كلام أمين الشرطة أروح يستهزءوا بيا ويقولوا عليا مجنون أو بهلوس بس انا ههلوس إزاي وانا غرقان في دمي والاسعاف هو اللي شايلني من الأرض وبشهادة الجميع الساعه 2 بالليل وعلاجي مثبت ورقة وقلم الإصابات اللي عندي لولا سرعة الإسعاف كان  زماني في تعداد الموتي لولا عناية الله».