نشر الفنان أحمد فلوكس صورتين له عبر صفحته الشخصية بموقع التواصل الاجتماعي "فيسبوك" تحدث فيها عن أسوء فترة في حياته.
وعلق "فلوكس" على الصورتين قائلا: "الصورتين دول مابيفرقوش عيني ولا عقلي.. الصورة اللي ببدلة دي كانت في أسوء فتره في حياتي رغم اني كنت ناجح وشركاتي بتنجح وبتحرك وبشتغل وكنت بستغرب انا شكلي بيعجز ليه وليه عامل كده وليه الأبيض بقي كتير في دقني وليه مش سعيد وليه مش مظبوط وتساولات كتير رغم إني كل شويه كنت بسافر أعمل عمره لكن شكلي وحياتي و نفسيتي وتصرفاتي بتسوء لاسوء.. فترة غريبة جدا في كل حاجة".
وتابع: "دي فترة اللي اكتشفت فيها حاجات كتير وحصل بعديها واقعه الأمن دي الفتره اللي السحر والأعمال والدمار وشرور البشر والخيانة والغدر والتوهان ومش شايف حاجة وكل ما هو سئ بيدمروا فيا وفي صحتي وفي حياتي وأنا مش فاهم حاجة.. معمي البصيرة والإحساس عجوز من الداخل مربوط في حزن بلا سبب رغم نجاحي مش عاوز أمثل مش عاوز حاجة ولا فاهم حاجة،، و كل شويه مستشفى وكل شويه تعب والدكاترة مش لاقيه سبب طبي صريح".
وذكر: "الصورة التانية دي بعد ما ربنا عفاني وأكرمني بالشفاء من السحر والأعمال وأذى من حولي والبصيره والراحة.. عفاني من أسوء أنواع البشر وأعطاني البصيرة لأرى من حولي جيدا وأرى قوة و عظمة ربنا في معطياتوا لينا ورحمة الله الواسعة.. قربوا من ربنا وأعلموا جيدا أن لن يمسكم سوء وستنور بصيرتكم".
واختتم أحمد فلوكس قائلا: "نصيحة اختارواا الناس اللي تبقي في حياتكم كويس.. وابعدوا عن كل شخص موذي وكاريه وماتتخدعوش بالمظاهر والكلام وقربوا قوي من ربنا.. يارب أبعد كل أذى عن بيتي وأهلي وابني وعبادك يا رب.. واعطيني القوى لأحمي أهل بيتي وابني الصغير من الأذى.. وأدمر كل من يحاول أذيتهم".
