قالت فاطمة دياب، فتاة تعرضت للتحرش في بني سويف، وأصرت على التقدم ببلاغ ضد المتحرش، إنها تخرج يوميًا من منزلها لتشتري طلبات المنزل وهي تقود دراجة، مشيرة إلى أن المنطقة والمجتمع المحيط بها لا يتقبل ذلك على الرغم من أنه لا يوجد ما يمنع ذلك.
وأضافت "فاطمة دياب"، خلال اتصال هاتفي ببرنامج "التاسعة"، الذي يقدمه الإعلامي وائل الإبراشي، عبر التليفزيون المصري، أنها فوجئت بجارها ينتظرها أمام المنزل ويعرض عليها المساعدة بحجة خوفه عليها من الكلاب، متابعة: "قالي أركبي العجلة، أنا خفت فبعدت شوية صغيرة ناحية الكاميرا، وفوجئت أنه بيتحرش بيا ومش قادرة أنسى إحساسي من ساعتها".
وتابعت: "ده مش أول مرة يحصل، وكنت اتعرض لتحرش لفظي، لكن المرة دي كان صعب، وأنا قولت بيني وبين نفسي أني مش هسكت، وعلى الأقل هكلم أهله واشتكي من التصرف البشع اللي حصل ده، وهو اتجرأ عليا لأنه تخيل أني مش هقدر أخد حقي، ولما اشتكيت لأهله برروا له وقالولي إنه كان بيسندني عشان كنت هقع، والحمدلله إن فيه فيديو باللي حصل كله، وهما عرضوا عليا فلوس وأنا رفضت".
واستطردت: "عملت المحضر يوم الخميس وألقي القبض عليه يوم الأحد، وكل ما أفكر في الموضوع بحس بلمسة إيده على جسمي، وأنا ليه أعيش بالألم ده وأنا معملتش أي حاجة غلط تستدعي أنه يتحرش بيا".
