تلقت الإعلامية رضوى الشربيني، في برنامجها «هى وبس» المذاع عبر فضائية «CBC سفرة» اتصالًا من فتاة تُدعى «مروة» تشكو فيه من عدم معرفتها بقيمة راتب زوجها.
وقالت المتصلة: «إحنا من غيرك ولا أي حاجة وأنتي العقل المدبر لستات مصر مش قادرة أقولك أنا بتفرج عليكي ومتابعاكي على طول وجوزي بيتخض لما بيعرف أني بتفرج دلوقتي على رضوى الشربيني ودايمًا يقولي رضوى الشربيني ربنا يستر وهو عارف أنك العقل المدبر لنا كلنا».
وأضافت أنها لديها مشكلة مع زوجها التي تزوجته زواج صالونات منذ 5 سنوات، قائلة: «دلوقتي أنا جوزي بيخبي مرتبه مني معرفش منه أي حاجة وبالصدفة عرفت هو بيقبض كام وبعد ما عملت عشانه كل ده محستش أنه عوضني أي حاجة وهو معرفني أنه بيقبض مثلا 100 جنيه لا هو بيقبض أكتر ومعرفني أنه بيقبض 100 جنيه بس مثلا يعني».
وردت رضوى الشربيني قائلة: «هتزعلي مني؟ الغلطة غلطتك أنك عودتيه على كده»، ونصحتها بالإمتناع عن إعدادها أكل لزوجها وتنظيف المنزل وإحضار أي شيء يخص المنزل: «مش هتجيبي حاجة خالص وفين الميه مفيش ميه فين الأكل مفيش أكل».
وتابعت الشربيني: «هتأكلي نفسك والبيبي.. وجوزك هيدخل البيت لا فيه أكل ولا فيه ميه ولا فيه حاجة خالص وبقولك إيه البيت مش نضيف قولي له معيش فلوس أجيب حاجات مستحضرات التنضيف».
واعتبرت «الشربيني» أنها بذلك ستضعه أمام الأمر الواقع على حد قولها: «حطيه قدام أمر واقع طالما هو مقتدر ومعاه فلوس أنه يصرف عليكي».
وزعمت «الشربيني»، أن الشرع يحتم على الزوج أن يحضر الأكل لزوجته جاهز وأن الزوجة غير ملزمة بالطبخ لزوجها قائلة: «حبيبتي هو شرعًا قبل ما هختم معاكي أنا لسة أمبارح كنت بتفرج على فيديو لشيخ بيقول إن فكرة أن الراجل يصرف ويجيب فلوس ويبقى مسؤول عنك في الدين الإسلامي يعني أنه هو ميجبلكيش الرز والزيت والبصل وانتي تطبخي لا يا ماما طلع يجيب لك الأكل جاهز».
واستطردت: «قانونًا وشرعًا وإنسانيًا المفروض اني بعد ما أنا وقفت جنبك أنت تعوضني لو معوضكيش مبقولكيش اطلقي ومبقولكيش سيبيه بس بقولك أجبريه ورجعيه على التراك المظبوط وعلى الطريق الصح هيدخل بيت مش هيلاقي أكل».
