نشبت مشادة حادة على الهواء بين كابتن مجدي عبد الغني، عضو مجلس اتحاد الكرة، والناقد الرياضي أحمد عبد الباسط، بشأن اختيار المدير الفني الجديد للمنتخب.
وقال عبد الباسط: "ما ينفعش تضلل الرأي العام ولا تضحك عليهم، انتوا مش بتطلعوا الحقيقة".
ورد "عبد الغني"، خلال مداخلة تليفونية مع الإعلامي معتز الدمرداش، ببرنامج "آخر النهار"، المذاع عبر فضائية "النهار وان" مساء الأربعاء،: "أنا مش بضلل حد ولا بضحك على حد، محتاجين نسمع بعض، والصغير يحترم الكبير، وكل مكان فيه خلاف"، مؤكدًا أنه لا يوجد أي فائدة ستعود إليهم من تضليل الرأي العام.
وقال الناقد الرياضي: "الاتحاد مش منظم، والدليل اللي عمله مجدي عبد الغني في المؤتمر بعد عودته من روسيا، وحققوا معه"، ورد عبد الغني: "أنت كتبت عليا إني حرامي، أقسم بالله اللي بتقوله محصلش، وأقسم بالله ماحدش حقق معايا، أنت بتقول كده علشان مش بطلع معاك في البرنامج، وكل اللي بتقوله كذب وافتراءات".
وأضاف "عبد الباسط": "أنا لو منك وصحابي في الاتحاد اتهموني الاتهامات دي أحترم نفسي وأستقيل"، ورد "عبد الغني": "أنت مالك استقيل ولا لا، وأنا بحترم نفسي، وأنت لما تكتب خبر غلط استقيل".
