اختيار عشوائي يعتمد على الصدفة أو المعرفة السابقة لأسرتين، فيبدأ الطرفين في نسخ خيوط علاقة جديدة قد تدوم العمر، ويراهنان على ظهور العاطفة بعد التفاهم؛ ليتم الاتفاق على بنود العقد بعد جلسة التعارف الأولى وارتياح العريس والعروس..الحديث عن زواج الصالونات.
وفي هذا السياق، روت الفتيات أطرف مواقفهن مع زواج الصالونات عبر صفحة «الكومنت الفصيل» على موقع التواصل الاجتماعي «فيس بوك»، ونرصد أبرز تلك الحكايات في السطور التالية:
عريس دليفري
سخرت «سمية» من والدة عريس صديقتها، قائلة: «صاحبتي متقدم لها عريس نازل أجازة من الخليج، بيحددوا ميعاد عشان المقابلة، والدتها بتقولهم شرفونا يوم الجمعة.. أم العريس قالت لها معلش شوفي ميعاد غيره، علشان رايحين نشوف عروسة تانية في نفس الوقت».
غلطة وندمانة عليها
فيما قالت «ميرو»: «دي أخر حكاية ليا في الصالونات، بس العريس قابلته عن طريق صاحبتي، وكنت حاسة إني في القسم بيتم استجوابي، أو بعمل «نترفيو شغل»، سألني حبيتي قبل كده، مفكرتيش تكملي دراساتك العليا .. وعندك صحاب ولاد، كنت هقوله وأكتر من البنات بس مش مرتبطة ..سيمبلي مكنتش هوافق اقعد من الأول ..غلطة وندمانه عليها».
الحجاب وسي السيد
وأضافت «مي»: «قالي لازم تلبسي الحجاب رغم انه بيتفرج عليا بطريقه تحرش الشوارع، وبلاش لينسس ألوان، بتعرفي ترقصي، تطبخي ..ارتبطتي قبل كده، وشايف نفسه سي السيد».
مرتبك كام!
أما شروق فذكرت: «قالي مرتبك كام ..لبسك شكله غالي أوي ..بس قصير.. مفكرتيش تتحجبي».
وأضافت دعاء: «قالي بصي بيني وبينك كده أنا موافق ومش عايزين نضيع وقت في التفكير والكلام ده.. وأنا عموما جاهز وهنعمل الفرح بعد شهر من دلوقتي عشان أسافر.. قولتله انت جاي تشتري تلاجة».
سوق عكاظ
وتابعت هنا: «كان جاي هو وأهله، قالي بطلي شغل، واقعدي في البيت مع أمي وأخواتي، عايزين واحدة تخدم عليهم مش شريكه حياة».
وأضافت: «من الأخر قررت مكنش في الفاترينة وناس تتفرج عليا حتى لو متجوزتش بس ع الأقل محسش إني معروضة في سوق عكاظ».
قلة ثقة
وعن قصة هبة، فتقول: «أنا اتقدملي واحد وبعد زن كثير من أهلي إني دخلت على الـ 24 و لسة ماتجوزتش وكدا وافقت أشوفه، المهم مبدئيا عايز واحدة مطيعة وهادية ومبتعملش مشاكل، تاني حاجة أنها لما تيجي تخرج مع أصحابي أروح البيت الساعة 6 المغرب، ثالثا أهلك مايجلولكيش غير مرتين في الشهر بعد الجواز، رابعا من البداية في أول الخطوبة كدا أو تاني يوم من الخطوبة لو كانت حصلت يعنى عايز حاجات معينة».
وتابعت: «خامسا شايف إن الغيرة دي قلة ثقة بالنفس لو غيرت عليه يبقى ماعنديش ثقة في نفسي، ومافيش حاجة اسمها شغل خالص، سادسا ماينفعش بعد الخطوبة انزل صوري على social media لأن الناس حتحسدنا على الخطوبة».
وأضافت أيضًا: «سابعا أنا عايزك بالوزن دا ماتتخنيش عن كدا ولو جوعتي امسكي نفسك علشان ماتتخنيش ولو تخنتي حبص بره، وبعد لما رفضته خطب بعدها بأسبوع».
تجربة رائعة
فيما رد محمد عزيز على حديث البنات، قائلًا: «والله عن تجربه..أفضل الجوازات اللي انتوا مسمينها صالونات..الفساد والبجاحة وقلة الأدب مانتشرتش إلا من علاقات الحب.. أنا خطبت واحدة كانت بينا علاقة سبع سنين وفسخنا قبل الفرح بشهرين بسبب المشاكل اللي بينا، وبعدها خطبت واحده من الصالون».
وأضاف: «ولما عرفتها وعرفتني وحبتها وحبتني، والله حسيت أن اللي فات كله كان هري وكلام فاضي وأوهام، حسينا والله أننا بنحب بعض من سنين رغم إننا نعرف بعض بس من تلت شهور، يا جماعة فكرة جواز الصالونات فكره ايجابيه جدا وعن تجربه».
