التور قَطَع كل الحِبَال الميتة
برطع فى أرض النور غرور
ونط من فوق الزمن كسر إزار
كل العقول النايمة في داء الخنوع
وَقَّع قناع المرجلة
فاتعرى فيها جسمها
شفط البزاز من نسلها
بضحكة تتكرع هياج
قبض على رقاب البشر
اللى دموعهم تستغيث
ما لحقها حد من الأمم
يرمي شباكه يقَيِّدُه
ما يفتريش
الساحة فاضية فى ملعبه
والكل خايف يِلْجِمُه
نطوا على سطوح الهلع
لما بلع أرض المنال
وخد معاه أرواح كتير
وقال أنا الواحد هنا
بقرونى أنفد فى المحال
الأرض أرضي وشمسها
ليا أنا وانتم وبال
كاتمين على انفاس الحياة
سبعين سنة
يا حضرة التور اللئيم
مهما غرورك فَهِّمَك
الآه بتكوي أضلعي واليوم حزين
والصرخة تايهة تروح لمين
وان الجرس صابه الخرس
ما بيسمعوه المسلمين
ولا اللى ناموا ع الصليب
ولا الى جنبك مغرمين
بالقتل فى الحق المبين
ولا الضمير اللى انهرس
تحت رجول السكرانين
ولا مجالس تلحقك
بالفيتو أو بجيوش دمار
إحنا العرب المنبوذين من فكركم
بنقول لكم
في شرع مين؟
غزة تموت تحت الحصار
والأرض غَرَّقَهَا الأنين
آن الآوان يطلع نهار
يفتح خزاين كل دار
من قوة كنت بتستهين
ترسل مطر ينزل رصاص فوق جسمكم
فوق أرضكم
فوق فكركم
يا تران وعايشة بقرنها
تفتح بطون المؤمنين
أن الوطن هو الحياة
والدم أرخص من فداه
ومهما ريح الموت نداه
إحنا نموت لكن أكيد
وبصوت عنيد
وبعزم أقوى م الحديد
يبقى الوطن
