أنا الحلوة اللى مالى زي.
أنا أشطر بنات الحي.
أنا اللي أبويا خلفني قمر طالع،
في عز الليل.
وخلف لى من خوفه علي بعده،
أسُوود..واسباع.
أنا اللي عندى رجالتي،
عددهم كام وعشرين خيي.
أنا اللي أبويا عمره ما باع،
قمر ليله لأي غريب.
أنا الأمجاد
أنا العٍزة
ولو سألوني: إيش اسمك يا زينة الناس؟
أقول: "غزة".
كرامتي فوق حدود الكل.
مانا أصلي مونسني.
وليا أخوات في عين الشمس،
حل.... وضل.
صقور.. ونسور..بتحرسني.
ومين يجرأ بطرف العين يبص علىّ؟
ومين يجرأ بكف يمينه يلمسني؟!!!
ولما" الأقصى" ناداني بدمع العين.
وقلب" خليلي" خباني شمال ويمين.
قالولى: ديب كسر بابك وحل" جنين."
و"عكا"...و"يافا" مكسورة،
وكنيسة المهد....
قولولي: مين من اخواتي اللي خان العهد؟؟؟؟
قولولي: مين من اخواتي اللي باع الود؟؟؟
قولولي: مين من اخواتي شاف الصهيوني آسرني ما قمشي يرُد؟؟؟
أبويا مات وفهمني إني مش وحدي.
معايا اخوات يشوقوا الخوف بخنجرهم،
وبين نيران أعاديهم،
أقل ما فيهم ايعدي.
ولو كان التمن موته،
عشان شرفي
عشان عاره،
تقيد ناره،
يعدى بحور من الأهوال،
في غمضة عين يكون عندي.
أكيد فيه شي مش فهماه،
ايه اللي يخلى أخويا
يشوفني قصاده، بتبهدل قصاد عينه،
يبص وراه.؟
وفى القرآن وفى الإنجيل، وفى التوراة،
أنا الغاليه.
أنا القبه، أنا الصخرة،
أنا راية سما عاليه.
أنا الإسراء أنا المعراج،
انا في العهد والمزامير،
بكاااام حجة وتقديسة.
تدوس ارضى عيال خنازير،.
قلوب مرضانه وخسيسة؟؟
ياخويا ياللى شايفني،
وانا فى الوحل بتمرغ،
ومغصوبة.. ومعصوبة.
وشايف أولادي ودماهم،
على الأسفلت.
وشايف كل حورية على أرضي،
ب ١٠٠ راجل.
سلاحها صاحي في ايديها،
ونسيت إنها كات بنت.
أنا وأولادي هنحارب لأخر يوم.
لأن القدس عربية.
كيان واحد، مفيش القدس شرق وغرب.
لأن القدس عربية..
هقدم روحي واولادي كمان قربان.
وهستنى انتصار الرب.
أنا ف وش الطوفان وحدي.
ولا عمره هيغلبني،
أنا بس اللى عايبني،
يقولوا القدس ملهاش حد!!!
يقولوا القدس ....
ماليهاش.....
حد.
