نشرت الفنانة المعتزلة حنان ترك على حسابها الخاص بموقع التواصل الاجتماعي فيسبوك صورة جمعتها بزوجها رجل الأعمال محمود مالك، وجهت من خلالها رسالة إلى الأشخاص الذين يشعرون بالنشوة من التنمر على غيرهم.
وكتبت حنان معلقة على الصورة: "هترتبطي بواحد علشان فلوسه هتلاقي قلبه مفلس حُب.. وأنت هترتبط بواحدة علشان شكلها هتلاقي قلبها مليان قسوة، ساندوتش الفول بيشبع وترابيزة عليها أكل بـ1000 ج بتشبع .. وبطنك مش هتعرف الفرق".
وأضافت حنان: "لابس هدوم ماركة بتستر جسمك ولابس هدوم من السوق بتستر جسمك.. وجسمك مش هيحس بالفرق، راكب عربية موديل السنة هتقضيلك مشوارك والعربية القديمة برضو هتقضيلك مشوارك.. ورجلك ف الحالتين هترتاح".
وتابعت: "البيت الصغير بيسترك والقصر الكبير بيسترك.. وف الأول والآخر مش هناخد حاجة واحنا رايحين ع القبر".
واختتمت منشورها قائلة: كفاية اهتمام بالمظاهر وكفاية اهتمام بالشكل والفلوس وكفاية نقص وظلم بنطلعه ع الضعيف أو اللي شكله وحش أو اللي مُش معاه.. الشبع ف العين مش ف البطن والغنى ف النفس مش ف الجيب".
وكانت الفنانة حنان ترك، قد طلبت من متابعيها في بث مباشر على حسابها بفيسبوك أن يساعدوها في التبليغ عن أي حساب أو صفحة تنتحل صفتها على موقع التواصل الاجتماعي "فيسبوك"، قائلة: "لا أملك أي حساب إلا هذا الحساب الرسمي الموثق".
وقالت ترك، إنها لا تمتلك الوعي والثقافة السياسية، مشيرةً إلى أنها لم تتطرق أبدًا إلى النقاش في موضوعات سياسية مؤخرًا، على عكس ما ينشر ويقال عنها.
وأضافت ترك: "عاوزاكم تساعدوني ضد أي حد بيتكلم على لساني.. في صفحات باسم الدين والسياسة بتتكلم على لساني.. وأنا عمري ما هتطرق للمواضيع دي.. لأني سياسيًا؛ جاهلة ومعنديش وعي ولا ثقافة سياسية.. وبالنسبة للدين.. لما اتحجبت من 2007.. ودرست علوم شرعية.. كان على سبيل النجاة.. وليس على سبيل الدعوة.. لأني أصغر بكتير من كده.. صعبت عليا نفسي من إن أصحابي وحبايبي زعلوا مني على حاجات مش على لساني.. معقول نسيوني أوي كده.. أنا فين والكلام ده فين.. أي حاجة تنزل على لساني.. أو يتقال إني بحلل شيء.. مليش علاقة بالكلام ده.. ولا بحرَّم ولا أحلَّل.. وأنا أصغر من إني أفتي.. وده له ناسه".
وأكدت حنان ترك أنها ستتخذ إجراءً قانونياً ضد كل من تحدث على لسانها، قائلة: "ربنا نصفني.. وكل الصفحات اللي بالملايين تراجعت.. ومش هسكت على أي حد اتكلم على لساني.. وبحذرهم يلغوا البوست ويشليوه.. لأني هبتدي آخد إجراءات".
ولم تظهر حنان ترك في حديث إلى جمهورها منذ فترة طويلة، على الرغم من انتشار الكثير من التصريحات المنسوبة إليها عبر صفحات مواقع التواصل الاجتماعي، الأمر الذي دفعها بعد صمت طويل إلى الخروج للحديث عن تلك الأمور وحقيقتها في بث مباشر عبر فيس بوك.
