نعى أحمد الركايبي، ابن عم الشهيد الرائد عماد الركايبي، على صفحته على "فيسبوك"، قائلا: "ربنا يرحمك يا ابن عمي.. و بنحتسبك عند ربنا من الشهداء.. وربنا يصبرنا على فراقك".
وتابع: "هو بطل علشان هوا انضف ضابط شفته في حياتي.. عمره ما جه على حد أو ظلم حد.. قدامي حصل اكتر من موقف كان ممكن يستخدم فيها "القانون" علشان يحبس ناس ولكن كان بيستخدم روح القانون.. وبيدي للمخطئ درس عمره ما ينساه.. هو بطل علشان يوم الانفجار نازل من بيته 4 الفجر علشان يأمن الكنيسة .. مع أنه بكل سهولة كان ممكن ميروحش.. ومحدش في الشرطة كان حيقدر يكلمه .. علشان إحنا عيله عندها كمية رتب مش طبيعية.. هو بطل علشان قبل التفجير ب 10 دقايق كلمه السواق بتاعه وقاله في تفجير في طنطا يا باشا.. لو عاوزني أجيلك وتروح.. فقاله لا ربنا يستر وماسبش مكان خدمته وروح لأطفاله الـ 3 اللي مش حيشفوه ولا حيشفهم تاني".
وعبر الركايبي، عن ضيقه من بعض رواد مواقع التواصل الاجتماعي، قائلا: "في ناس بتقول انه ابن عمي حضن اللي كان داخل يفجر نفسه.. وفيه فيديو اللي كل الناس شافته و الواد بيفجر نفسه عند البوابة.. وأنا بتكلم علشان مش عاوز حد يتاجر بدم واحد من اقرب الناس ليا.. ابن عمي بطل في نظري.. مش شرط أنه يحضن الإرهابي علشان يكون بطل!".
واختتم رسالته: "مش شرط أن أنت تشوفه بطل.. وميهمنيش إنك تشوفه بطل.. بس ياريت تدعيله وتدعلنا معاه .. ومتنساش أننا كعيلته لم نتاجر بدم ابننا ولا عاوزين حد يتاجر بيه.. فياريت بلاش كلام أنكم عاوزين تعملوا منه بطل وهوا معملش حاجة.. إحنا فينا اللي مكفينا".
