أنا روح

أغنية رائعة خطفت قلبى.. تقول الأغنية:

روح أنا روح

انا زيك فى خوفى، 

وف وجعى كمان

لحم ودم بيصرخ.. بيدور على الأمان

انا كلب شارع يا صاحبى اللى ملوش مكان

بمشى جنبك.. طمعان فى لقمة

مش طالب غير حنان

الارض مش بتعتك وحدك

الكون ده للجميع

ربك خلقنى أعيش جنبك

ليه تقتلنى واضيع

انا روح زيك يا انسان

من حقى إنى أعيش

مخلوق فى الدنيا أشارك

فى رحمة ميهمنيش

بتقولوا عليا متوحش «وبعُضّ» وأخوّف اطفال

اتمنى تسأل فى يوم إيه وصّلنى لدا الحال

لما قفلتها بيبان الرحمة

وشارع قاسى ومخيف

وجوع عاش فى بطني

مفيش ولا حتى رغيف

الخوف علمنا الشراسة والظلم خلانا نصرخ

لو كنت مكانى فى يوم كان قلبك يمكن رق

فاكر حكاية القطة زمان

اللى دخلت صحبتها النار

لا أكلتها ولا سابتها

دى الرحمة للقلب اختبار

ربك بيحاسب ع الروح اللى بتعانى فى سكات

متكونش أنت سبب موتي، وتزودنى اهات

تحية لمن وضع الكلمات ومن وضع اللحن ومن قام بالغناء فهى تجسيد للمعنى الحقيقى للإنسانية والإيمان بجميع الأديان.

تحية كبرى ايضاً لمن يرحمون مَن فى الأرض لكى يرحمهم مَن فى السماء.