الديوان| يس النحايفة يكتب: سيما أونطة

لو يرجع تاني العمر لأول لَقْطَة
يمكن كنت هاعيد توزيع الضوء في ملامحي
وأثبّـت لوني القمحي
بحبة قسوة زيادة
وارسم في شفايفي
- على غير العادة- 
بسمة تليق بأفيش العمر
فيها دهاء مش جوايا
لكنه بيديني حماية
- مسامير وازاز مكسور
متثبت فوق حرف السور 
بيحارب سطو الأيام 
وهجوم الأوغاد في المشهد -
وأعيد تصوير لقطات 
كانت محتاجة
لأداء غير تقليدي 
- نظرة عيني الحبلى ببحر دموع
لحظة ما بيخرج آخر حرف 
بينبض موت من قلب قصيدة
كانت مكتوبة لقلبِك-
- رعشة خوفي 
ف أول مرة نادتني شفايفِك 
ف عملت إن أنا مش سامع -
- زفة روحي لما باخُش الجامع
علشان أغسل بصلاة الوصل ذنوبي -
لو يرجع تاني العمر لأول لَقْطَة
كنت هالوِّن مشهد زهر شبابي
الأبيض وأسود
وأعيد مونتاج الفيلم بحالُه
وأصوَّر كل الليل الداخلي
نهار 
وأضيف أدوار
واحذف أدوار
واملأ الشاشة حضور
واخلّي الماستر سين
مشهد 
بيجمَّع كل الكومبارس
بعد مرور الجزء الأكبر م الفيلم 
في هتاف م القلب 
- سيما أَونْطَة 
سيما أَونْطَة!