الجعفرية قلعة الأثاث في الغربية.. حين تتحول الأخشاب إلى فن | فيديو

كتب: ماجدة شلبي 

في قلب محافظة الغربية وتحديدًا داخل مركز السنطة تبرز قرية الجعفرية كنموذج فريد لقلاع الصناعة اليدوية في مصر، حيث تحولت هذه القرية الهادئة التي يبلغ تعداد سكانها ستون ألف نسمة إلى واحدة من أهم مراكز تصنيع الأثاث على مستوى الجمهورية .

وباتت تُصنف كثاني أكبر قرية منتجة للأثاث بعد دمياط، هنا لا تُعد المهنة مجرد وسيلة للرزق بل هي أسلوب حياة وتراث متوارث وهوية متجذرة في كل بيت وورشة.

ومنذ اللحظة الأولى لدخولك القرية تلمس روح العمل في كل مكان أصوات المناشير رائحة الأخشاب وحركة الأيدي التي لا تتوقف عن الإبداع. 

وداخل مئات الورش المنتشرة في شوارع الجعفرية، تبدأ رحلة تصنيع الأثاث من الصفر بداية من تصميم وإنشاء الهيكل الخشبي مرورًا بمراحل الدهان والتشطيب وصولًا إلى التنجيد والتقفيل النهائي ليخرج المنتج في صورة قطعة فنية متكاملة تضاهي أكبر المصانع.

يقول المهندس مصطفى جمال صاحب أحد مصانع الأثاث بالقرية: "الجعفرية مش مجرد قرية بتصنع أثاث دي منظومة متكاملة عندنا كل مراحل الإنتاج بتتم هنا وده بيدينا ميزة تنافسية كبيرة الحرفة هنا اتطورت بإيد ناس شاطرة جدًا عندها خبرة سنين طويلة وده اللي بيخلي المنتج بتاعنا مميز وقادر ينافس في السوق".

وأضاف: "أهم حاجة بتميز أهل الجعفرية هي حبهم للشغل وإخلاصهم فيه مفيش حد هنا قاعد من غير شغل لأن كل بيت تقريبًا مرتبط بالمهنة بشكل مباشر أو غير مباشر، الصناعة دي قضت على البطالة في القرية وخلت الشباب يفضلوا يشتغلوا ويتعلموا الحرفة بدل ما يدوروا على شغل بره
وأشار أيضًا إلى أن الموقع الجغرافي للقرية كان له دور كبير في زيادة الإقبال على منتجاتها".

وأوضح: "قربنا من محافظات كبيرة زي المنوفية والدقهلية وكفر الشيخ، وكمان سهولة الوصول لنا جعلت التجار والعملاء يجوا لحد عندنا وده زوّد الطلب بشكل ملحوظ على الأثاث اللي بيتصنع هنا".

وأضاف أن جميع أنواع الأخشاب المستخدمة في صناعة الأثاث المصري يتم إستيرادها روسيا ورومانيا وفنلندا.

ومن جانبه، تحدث الأسطى أحمد الحفني أحد أقدم العاملين في المهنة بنبرة مليئة بالفخر: "إحنا ورثنا المهنة دي عن أبائنا وأجدادنا دي موجودة في الجعفرية من أكتر من 80 سنة، زمان كانت بسيطة جدًا ومع الوقت اتطورت بإيدينا لكن لسه محافظين على الروح الأصلية للشغل".

وتابع: "الفرق بينا وبين دمياط مش في الشطارة بالعكس إحنا عندنا صنايعية على أعلى مستوى لكن هما سبقونا في دخول التكنولوجيا والماكينات الحديثة، إحنا لسه بنشتغل بشكل كبير بالطرق اليدوية وده رغم إنه بياخد وقت ومجهود لكنه بيطلع شغل فيه روح وفن".

ومن داخل إحدى ورش الدهان، يشرح الأسطى توفيق الأستورجي تفاصيل واحدة من أهم مراحل التصنيع قائلًا: "الدهان ده عالم لوحده، وعندنا أنواع كتير جدًا وكل نوع بيختلف حسب الموديل وذوق العميل في دهانات كلاسيك وفي مودر، وفي اللي بيدي لمعة وفي المطفي وكل ده بيتحدد في الآخر على حسب ميزانية العميل". 

وأكد: "الشغلانة دي محتاجة دقة وصبر لأن أي غلطة صغيرة في الدهان ممكن تبوظ الشكل كله علشان كده لازم الصنايعي يكون فاهم كويس هو بيعمل إيه".

أما عن مرحلة "الأويم" أو الزخرفة، فيوضح الأسطى إبراهيم أحد المتخصصين في هذا المجال: "الأويم أو الفرم اللي بتتشاف في الأثاث دي بتتعمل يا إما على خشب MDF أو خشب زان بس إحنا دايمًا بنفضل الزان لأنه أقوى وأجود وبيعيش سنين طويلة من غير ما يتأثر"

وأضاف: "الشغل ده مش لأي حد دي حرفة محتاجة فنان قبل ما يكون صنايعي لازم يكون عنده حس جمالي علشان يقدر يطلع الأشكال دي بالشكل اللي يرضي العين"

ولا تقتصر أهمية صناعة الأثاث في الجعفرية على الجانب الاقتصادي، فقط بل تمتد لتشمل الجانب الاجتماعي أيضًا، حيث ساهمت هذه المهنة في خلق مجتمع مترابط يجتمع أفراده حول هدف واحد وهو الحفاظ على هذا الإرث وتطويره.

فالآباء يحرصون على تعليم أبنائهم أصول الحرفة منذ الصغر، لتظل مستمرة عبر الأجيال في مشهد يعكس قيمة العمل اليدوي وأهميته، كما أن التعاون بين أصحاب الورش والصناع يمثل عنصرًا أساسيًا في نجاح المنظومة حيث يعمل الجميع بروح الفريق.

ورغم التحديات التي تواجه هذه الصناعة مثل ارتفاع أسعار الخامات وعدم انتشار التكنولوجيا الحديثة بشكل كافٍ إلا أن أهالي الجعفرية يواصلون العمل بإصرار معتمدين على خبرتهم ومهارتهم للحفاظ على مكانتهم في السوق.

ويأمل العديد من العاملين في المجال أن تشهد الفترة المقبلة مزيدًا من الدعم سواء من خلال إدخال الماكينات الحديثة أو توفير فرص تدريب متطورة بما يساهم في زيادة الإنتاج وتحسين الجودة بشكل أكبر وأيضا من خلال إنشاء معارض تليق بمجهودهم المميز.

وتظل قرية الجعفرية نموذجًا حيًا لقدرة القرى المصرية على تحقيق التميز والريادة في مجالات الصناعة المختلفة بفضل سواعد أبنائها وإيمانهم بقيمة العمل وتمسكهم بجذورهم.