محمد رمضان: مصر أكبر ساحة غنائية وبتضايق لما يتقال إننا عالم ثالث

حل النجم محمد رمضان، ضيفًا على الإعلامية جيهان عبد الله، في حلقة خاصة من برنامج «أجمد 7»، عبر إذاعة «نجوم إف إم».

وقال محمد رمضان خلال البرنامج: "فيه فنانين نجحوا فى بلادهم العربية لكن منجحوش في مصر، أنا بدأت فى أصعب مكان موجود فى الوطن العربى، وهو الساحة الغنائية المصرية، وصعب إن أى حد ينجح فى مصر، وممكن أنجح لكن الاستمرار صعب، كمان أبقى فى مكانة كبيرة".

وأضاف محمد رمضان: "لما بدأت أقدم حفلات، عملت زى ماجستير فى ما هى الحفلة، واكتشفت إن زمان الحفلة كانت عبارة عن تخت المغنى بيقعد عليه، والجمهور يبقى قاعد قدامه مربع فى قعدة غنائية، والمطرب يقعد يدندن".

وتابع محمد رمضان: "بعد كده الموضوع تطور والمغني بقى يقوم يقف، ويقعد على كرسى، ولكن ممنوع يحرك رجله أو راسه، بيبقى زى الخشبة على المسرح، وبعد كده حصل تطور وبقى يهز راسه ويرفع ايده فى أواخر الستينيات، زى ما كنا بنشوف عبدالحليم حافظ، اللى بعشقه وبحب أسمعه".

واستكمل محمد رمضان: "بعدين فى منتصف الثمانينيات المغنى بقى يشيل المايك ويتحرك بيه على المسرح، ودا كان غريب على الناس إزاى المغنى يعمل كده".

واستطرد محمد رمضان: "بضايق جدا لما حد يقول إن مصر عالم ثالث، لا مصر عالم أول، كل أصحابى اللى فى مصر عالم أول، أنا ليا صحاب إنجليز وفرنسيين وعندى صحاب مصريين أذكى منهم، ومتعلمين وبيتكلموا أحسن منهم، وملمين بكل اللى بيحصل فى العالم".

وكانت هالة حجازي، المدير التنفيذي والعضو المنتدب لشركة النيل للإنتاج الإذاعي المالكة لإذاعة «نجوم إف إم»، «The Global Icon» كرمت النجم محمد رمضان.

وأهدت هالة حجازي النجم محمد رمضان ميكروفون «نجوم إف.إم» الذهبي تقديرًا لإسهاماته الفنية والغنائية المؤثرة.