والدة السباح الراحل يوسف محمد: «عايزة حق ابني»

كشفت فاتن إبراهيم، والدة الطفل يوسف محمد، سباح نادي الزهور، الذي توفي أثناء منافسات بطولة الجمهورية للسباحة تحت 12 عامًا، تفاصيل صادمة تتعلق بواقعة وفاة ابنها ومدى الإهمال والتقصير من المسؤولين والمنظمين على منافسات البطولة.

وقالت فاتن إبراهيم، خلال تصريحاتها: «ابني راح.. ابني نزل السباق زي الفل وراح الاستاد قبل السبق بساعة ونصف.. واقف 20 حكم والإنقاذ واقفين على الجانبين.. محدش شاف ابني.. ابني كان تاني الجمهورية.. في واحد في السبق قال للحكمة في حد غرقان تحت فقالتله مفيش حد».

وأضافت قائلةً: «ابني فضل في القاع تحت لمدة 10 دقايق.. الحكام أدوا بريك 7 دقايق وابني ميت تحت المياه ومحدش حاسس».

وتابعت فاتن: «الإضاءة في الاستاد كانت سيئة جدًا ومحدش شاف اللي حصل لابني وأنا مشوفتش ابني».

ومضت تقول: «يوسف طلعوه وعربية الإسعاف كانت فاضية تمامًا.. وفقًا للوائح الاتحاد لازم يكون في جهاز صدمات قلب وجهاز إنعاش رئوي وجهاز إنعاش قلب.. ابني ركب عربية الإسعاف ومعهوش حتى دكتور معاه في عربية الإسعاف.. ابني وصل مستشفى دار الفؤاد ميت.. عملوله إنعاش 4 مرات وقلبه يقف تاني.. ابني طلع من تحت المياه ميت».

وواصلت قائلةً: «أنا مش طالبة غير حق ابني.. ومحتاجة تدخل من وزير الشباب والرياضة».