أطلقت المطربة الشابة ماس رحيم ابنة الملحن الراحل محمد رحيم، أولى أغنيات ألبومها الجديد، والتي تحمل عنوان "ضيعتني"، عبر صفحاتها وقناتها الرسمية بالموقع العالمي «يوتيوب»، وعلى جميع القنوات الفضائية الموسيقية.
وجاءت أغنية ماس رحيم الجديدة "ضيعتني"، من كلمات وألحان والدها الموسيقار الراحل محمد رحيم، وتوزيع موسيقى كريم أسامة، وتوزيع شركة ديجيتال ساوند.
وكانت ماس رحيم كشفت عن مفاجأة خاصة بأغنية "ضيعتني"، بقولها: والدي الفنان محمد رحيم هو اللي اختار لي أغنيات الألبوم ومن بينها أغنية "ضيعتني"، وهي قريبة جدًا من قلبي، ولحنها مفاجأة فهو قديم لحنها والدي في سن الشباب، واللحن موجود فيه إحساسه وتركيبته المعروفة في الألحان.. والدي كان حريص على عمل كل أغنية في الألبوم حالة خاصة وشبهي، وشايف إن أنا بس اللي هقدر أقدمها، بشخصيتي وبطريقتي وبأسلوبي، وده طبعا زي ما اتعودنا منه، مع اكتشافه لأي موهبة جديدة، بيرسم لها طريقها في الغناء، وأمثلة كثيرة قدمها بالشكل ده ومنهم الفنانة "روبي".
وتضيف ماس رحيم: اختارنا سوى أغنية "ضيعتنى"، وهي شبهي زي ماكان بيقول، والأغنية مش حزينة، ومعناها جميل، وتتخطى حاجز العنوان، وكل أغنية في الألبوم لها قصة وشخصية وموضوع مختلف، وأنا بقدم الألبوم بكل فخر مش علشان نفسي، ولكن علشان والدي، لأن انا شايفة اللي قدمه محمد رحيم مش قليل، لأنه قدر يغير شكل الموسيقى في الوطن العربي على مدار 30 عامًا.
وتسطرد ماس رحيم: أنا بدأت حب الموسيقى وعمري 5 سنين، وكنت بحس بوالدي والأجواء اللي كلها مزيكا، ده غير الجينات اللي توارثتها عنه، وكنت بكتب وألحن، وكان والدي بيسمعها وبيعجب بها، ولما وصلت إلى 8 سنين بدأت أركب الهارموني لوحدي- تركيب الهارموني في الموسيقى هو فن تنسيق الأصوات المختلفة معًا في وقت واحد لخلق تأثير موسيقي متناغم- والموضوع ده لفت انتباهه جدا وعرف إنى موهوبة، وبدأ في تبني موهبتي، بتعليمي العزف على الآلات الموسيقية مثل البيانو والجيتار، وكنا بنتكلم مع بعض بلغة المزيكا، لو هو عاوز يوصل لي إحساس معين أو العكس لو انا عاوزة أوصل له إحساس خاص، كنا بنغنى لبعض، كان صديقي وصاحبي وكان معايا في كل حاجة.
وأوضحت ماس رحيم: أنا شايفة التأثير اللي عمله والدي لازم يستمر، ويفضل موجود، ونسمع منه الجديد، اللي احنا عرفناه من أعماله نزل، لكن لسة في كمان حاجات ومفاجآت كتيرة الناس لسه ماتعرفهاش هتنزل مع الوقت، موهبته الفنية بتتعدى الوصف، حياته كلها مزيكا وأنا بالتبعية غصب عني إتأثرت بيه جدًا والناس كلها بتقول إني شبه والدي، من وانا صغيرة بذاكره، وكل تفاصيله كانت ملهمة بالنسبة لي، ورسالته وطريقة تعبيره عن نفسه كانت بتبهرني وبتخطفني، ومن غير ما احس مشيت في طريق المزيكا بالفطرة، شرف كبير ليا وبحمد ربنا كل يوم إنه خلاني بنته وخلاه أبويا، وأتمنى إن أغنية "ضيعتني" وجميع أغنيات الألبوم اللى هتنزل تعجب الجمهور.
رزان جمال: «أسد» أحلى من أفلام هوليوود.. وأحلم بالأمومة
شمس البارودي تكشف تفاصيل زيارتها لمقام السيدة نفيسة
سعد لمجرد ومحمد فضل شاكر يطلقان ديو «القمر ديالي»
