_ندى بهجت: المجاملات حرمتني من ادوار البطولة
_مشاهد الاغتصاب أو الإغراء تمثيل فقط ولا علاقة لها بالواقع
_أحمد العوضي من أكثر النجوم المستحقين لجائزة «دير جيست
_رفضت 5 مسلسلات للحفاظ على جودة اختياراتي الفنية
_ مشاهد البوس في الأبيض والأسود كانت طبيعية جدًا
حققت الفنانة ندى بهجت نجاحًا لافتًا من خلال الأعمال التي شاركت بها، ورغم قلة ظهورها على الشاشة وتقديمها لعدد محدود من الأعمال، فإنها تحرص دائمًا على اختيار أدوار مميزة تترك بصمة لدى الجمهور، ومن أبرز الشخصيات التي لاقت إشادة واسعة شخصيتها في مسلسل الأجهر، وكذلك دورها المؤثر في مسلسل توبة، حيث استطاعت أن تثبت حضورها الفني وتؤكد موهبتها في كل عمل تقدمه.
أجرت "بوابة أخبار اليوم" حوارًا خاصًا مع الفنانة ندى بهجت، تحدثت خلاله عن المعايير التي تعتمدها في اختيار أعمالها الفنية، ورأيها في استخدام البوتوكس والفيلر، كما كشفت عن الخطوط الحمراء التي تضعها لنفسها في التمثيل، كما وجهت رسالة دعم للفنانة وفاء عامر بعد الهجوم الكبير الذي تعرضت له مؤخرًا، كما تطرقت ندى بهجت إلى تفاصيل أعمالها الفنية الجديدة وخططها المقبلة على الساحة الدرامية.
في البداية.. حدينا عن مشاركتك في مهرجان دير جسيت؟
"بحب حضور مهرجان دير جيست، فهو يحتل مكانة خاصة في قلبي، لأنه مهرجان حقيقي بعيد تمامًا عن المجاملات، أعتبره من أقرب المهرجانات إلى قلبي، وأنتظره دائما كل عام".
من الفنانين من وجه نظرك تستحق التكريم في مهرجان دير جيست؟
"هناك عددًا كبيرًا من النجوم يستحقون التكريم، مثل الفنان أحمد العوضي وهو واحد من أبرز الأسماء الجديرة بالجائزة، وفي ناس كتير قدموا أعمال قوية ويستحقوا التقدير مش عايزة أنسى حد".
برأيك.. ما العناصر التي لا يمكن التنازل عنها في أي عمل تقدميه؟
"أنا بحب دايمًا أشارك في أعمال مختلفة، حتى لو كان الدور صغير، لكن الأهم بالنسبة لي يكون مميز وغير تقليدي، مش بهتم أعمل أي دور لمجرد الظهور، بالعكس خطواتي الفنية محسوبة وبطيئة شوية لأني باختار أعمالي بعناية شديدة، وده السبب اللي خلاني أعتذر مؤخرًا عن المشاركة في خمس مسلسلات، وده قرار مش سهل ومحدش يقدر ياخده بسهولة، لكن أنا عملت كده علشان أحافظ على اللي وصلت له وما اشتغلش لمجرد التواجد".
ألم تخشي أن يؤثر غيابك لفترة على تواصلك مع محبيك؟
" قلقت طبعا بعد رفضي حسيت بقلق وخوف من فكرة إن الجمهور ينساني، خصوصًا إن في سنة كاملة ما اشتغلتش فيها، لكن كان عندي عمل بره مصر ولسه ما اتعرضش، وهو مهم جدًا بالنسبة لي، وكمان معظم الأعمال اللي كانت بتتعرض عليا ما كانتش على نفس مستوى أعمال قوية شاركت فيها قبل كده زي مسلسل "الأجهر" ومسلسل "توبة".
هل هناك مشاهد أو نوعيات أدوار ترفضين تقديمها تمامًا؟
الممثل لازم يقدر يقدم كل الأدوار ويتقمصها بالشكل اللي يخلي الجمهور يصدقها والمعايير اللي عندي مينفعش اعملها هي اصلا مبتتعملش، ياعني لو كان في مشاهد ساخنة زي البوس مبتتقدمش سواء معاية او مع غيري و انا مقددرش اقول ان عندي معايير والمعايير دي اصلا مش موجودة، حتى لو في مشهد زي الاغتصاب، فهو مجرد تجسيد درامي للشكل وليس الواقع، أما مشاهد الإغراء، فهي لا تعني الإغراء المباشر، وإنما تكون بهدف إحياء الموقف أو توصيل فكرة معينة، قدمت أدوارًا من هذا النوع أكثر من مرة، لكنها لم تعتمد على الإغراء الحقيقي، وغالبًا يظهر ذلك من خلال الحوار، وبالنسبة لملابسي، فهي تعبر عن شخصيتي الطبيعية ودي شخصيتي، ولا يمكن اعتبارها إغراء".
اقرأ أيضا| خاص| حمزة العيلي يعلن مشاركته في الجزء الثاني من "النص" لرمضان 2026
هل ترى نفسك انك اتظلمتي فنيا؟
"شايفة نفسي اتظلمت فنيًا، لأن في أعمال كتير مهمة وحلوة كان نفسي أشارك فيها، لكني بشوف ممثلات مش مناسبين وما عندهمش موهبة واخدين بطولات في مسلسلات كبيرة، وأنا ما أرضاش بالظلم لا لنفسي ولا لأي فنانة حقيقية دارسة وموهوبة، طبيعي جدًا نحس بالظلم لما نشوف بطلات بيطلعوا في المسلسلات وهما أصلاً ملهمش فيها، وكل الموضوع قائم على المجاملات".
ما رأيك في عمليات التجميل مثل البوتوكس والفيلر؟
"لحد دلوقتي ما عملتش بوتوكس أو فيلر، لكن موقفي منهم هو مع وضد في نفس الوقت، يعني أنا مع البنت لما تلجأ لهم عشان تصلح حاجة أو تعالج مشكلة، وده طبيعي جدًا، وأنا شخصيًا ممكن في يوم من الأيام أعمل لو مثلًا حصلت مشكلة تحت عيني، عشان أحتفظ بنفس النضارة، لكن فكرة إنّي أعمل تغييرات مبالغ فيها زي نفخ الشفايف أو حاجات تانية، دي مش من اختياراتي أبدًا، الإصلاح آه، لكن التغيير المبالغ فيه لأ".
هل تؤمنين فعلًا بوجود شيء اسمه سينما نظيفة؟
"مفيش حاجة اسمها سينما نظيفة أو سينما غير نظيفة، السينما انعكاس طبيعي للثقافة والمجتمع والعادات والتقاليد اللي عايشين فيها، في زمن الأبيض والأسود كان في مشاهد بوس بشكل عادي وطبيعي جدًا، لكن دلوقتي الثقافة اختلفت وأصبحت أكثر تحفظًا، حتى في اللبس والتعاملات، وأنا بالتأكيد مش ممكن أقدّم حاجة بعيدة عن منطق المجتمع اللي إحنا فيه، وفي النهاية، السينما هي سينما، ومفيش تصنيف زي ما بيتقال نظيفة أو غير نظيفة".
كيف ترين ما واجهته وفاء عامر من اتهامات قاسية على السوشيال ميديا؟
"وفاء عامر صديقتي المقربة، وما تتعرض له ظلم كبير، إحنا أصحاب وبندخل بيوت بعض، ومستحيل أصدق أي كلام اتقال عنها حتى لو شفت بعيني، لأنها إنسانة خيرية جدًا، طيبة وجدعة لأبعد حد. واللي بيكون من الناس دي بيبان علعليهم حتى من حاجة بسيطة ".
ما الدور الذي تقدمينه في مسلسل كنبة الحبشي؟
"المسلسل مكوّن من 15 حلقة، وكل حلقتين فيه مرتبطين ببعض لكن في إطار منفصل عن باقي الحلقات، بقدم خلاله شخصيات متنوعة ومختلفة؛ مرة شخصية صعيدية، ومرة بنت من عائلة راقية، وأخرى شعبية".
وأخيرا.. ماذا عن دورك في فيلم جبل الحريم؟
"الفيلم بطولة جماعية بيشارك فيه نخبة من النجمات زي سوسن بدر، وفاء عامر، ونسرين أمين، وكل واحدة فينا بتظهر بشخصية مختلفة تمامًا، شخصيتي في العمل بنت دمها خفيف، بتحب تعيش حياتها وتخرج وتسهر وتغني، ومش فارق معاها أي حاجة، لكن مع الأحداث بنكتشف إن عندها جانب إنساني عميق وصدمة نفسية من طفولتها هي اللي أثّرت عليها وخلّتها تبقى بالشكل ده، وده بيغيّر كتير في مسار حياتها".
محمد حماقي يواصل حصد الأرقام القياسية.. أكثر من 15 مليون استماع
أروى جودة: زوجي بيخاف من الحسد.. وحلم الأمومة متروك لله عزوجل
نجوم الفن يقدمون واجب عزاء الراحله سهام جلال |صور
